Урунууну ветераны, сыйлы радист

Урунууну ветераны Табакъсойланы Билял 1932 жылда туугъанды. Кюйсюз уруш башланнганда, анга жангыз тогъуз жыл толгъан эди, немис аскерле туугъан эли Хабазгъа къалай киргенлери бюгюн да эсиндеди.

Сермешле тюз да юйлерини къатында баргъандыла, мектепде  уа немислиле кеслерини штабларын къурагъандыла. Эр кишиле фронтда эдиле, алай бла Билял, алыкъа сабий болгъанлыкъгъа, абаданла бла бирге не къыйын, ауур ишден да артха турмай кюрешгенди. «Элде сауут кётюраллыкъ эр киши къалмагъан эди. Маллагъа къарагъанма, бичен чалгъанма, тиширыула бла сабийле къалгъан эдик да, ол жумушланы боюнубузгъа алгъанбыз. «Хар не да фронт, хар не да Хорлам ючюн» чакъырыула хар къалайда салыннгандыла, биз да, кече-кюн демей, къолдан келгенни аямагъанбыз», - деп эсгереди акъсакъал.

Алай сынаула аны бла бошалмагъандыла – урушну огъурсуз кёчгюнчюлюк алышындыргъанды. Билялны юйюрю Къыргъызгъа тюшгенди, не къыйын болса да, анасы сабийлерине ачлыкъ сынатмазгъа кюрешгенди. Туугъан жерлерине къайтханлай а, ишге юйреннген адам урунуп башлагъанды, радист болуп, связьны тартханды. Биринчи АТС-ни ол орнатханды, сыйлы радист деген атха да тийишли болгъанды. Артда къыйын аппаратура, связь, кабель ызла да чыкъгъандыла. Алай бла битеу жашауун Зольск районда связь къурауда ишлегенди, урунуу жыллары элли беш боладыла. Кёп болмай а ветеранны юйюрюнде къууанч да болгъанды, анга бла юй бийчесине биринчи учхун туугъанды. Билялгъа 93 жыл толгъанды, огъурлу акъсакъал тириди, жашаугъа жарыкъ кёзден къарайды.