Уллу эришиулени аллында – ахшы сынам

Эркин тутушуудан  жаш гёжефлени араларында «Спорт терроризмге къажауду» деген чакъырыу бла эришиу къуралгъанды, анга бизни республикадан, къоншу регионладан да 2008-2009 жыллада туугъан жюзден аслам адам къатышхандыла.

Эркин тутушуудан республиканы олимпиада резервли спорт школуну башчысы Артур Закуев билдиргенича, бу эришиу жыл сайын тёрели халда къуралады. Алчы жерлеге чыкъгъанлагъа разрядла бериледиле, сора ол жаш спортчулагъа эришиуледе сынамларын ёсдюрюрге, фахмуларын кёргюзтюрге ахшы онгду. Жарауда неге эс бурургъа кереклисин ачыкълайды.

Спортчула уа бери сюйюп келгенлерин, эришиу бийик даражада къуралгъанын, алагъа жарыкъ, къонакъбай тюбегенлерин да чертедиле. Атлетлени кёбюсю мында даражалы эришиулеге хазырланадыла. Алда аланы Россейни биринчилиги сакълайды, аны ючюн а алагъа жангызда хорлам керекди. 

Эришиуню борчу  дагъыда  миллетле аралы келишиулюкню кючлеудю, жаш адамланы спорт бийикликлеге итиндириудю. Сёз ючюн, Кърымдан къауумгъа Къабарты-Малкъар къарындаш регион болгъанды. Кърымны къауумуну баш тренери Игнат Грек билдиргеннге кёре, республикабыздан кёп гёжеф эришиулеге аланы атларындан барадыла, эки субъектни спортчулары бир бирге юйрениу-жарау этиу жыйылыулагъа келедиле, артда керти шуёхла да боладыла. Бу жол хорлагъанлагъа майдалла, кубокла бла эсде къалырча саугъала берилгендиле.