Жюреклени учундургъан назмула

Жыл сайын 21 мартда Поэзияны битеудуния кюню белгиленеди.  Анга атап Кавказны жазыучуларыны клубу  Нальчикде Къулий улу атлы китапханада   тюбешиу къурагъанды.

Жыйылгъанлагъа алгъышлау сёзюн клубну бёлюмюню башчысы, жазыучу эмда журналист Османланы Хыйса айтханды.  «Поэзия - къуру назму жазыу тюйюлдю. Ол заманны солуууду, адамны жаныны кюзгюсюдю, жюрегини ауазыды. Хар назму да сезимле, сыфатла, суратла тюбешген бир гитче дунияды. Поэзия бизни тёрели затлада ариулукъну кёрюрге, къатыш дунияда магъана табаргъа, жашауну хар жанын да сюерге юйретеди», -дегенди ол.

  Османланы Хыйса жашаугъа, сюймекликге, тиширыугъа багъа берген назмуларын окъугъанды. Жазыучу Абайланы Сакинат, жууукъ кезиуде малкъар халкъны Жангырыууну  кюню белгилениригин айтып, «Жауунла» назмудан юзюк бла шагъырейлендиргенди. Ол сюргюнде болгъан, андан къайтып келгенден сора да миллетни терен маданият дуниясыны байлыгъын бла жашырынлыкъларын чыгъармаларында эмда суратларында ачыкълагъанланы эсгергенди.

Къонакъланы санында «Альтернатива» клубну башчысы Жамбекова Марита да бар эди. Аны бла бирге келген жаш адамла - Афаунова Эльмира бла Небежев Малик Къулийланы Къайсынны «Ана» эмда Инна Кашежеваны «В необозримых просторах» назмуларын окъугъандыла. Герпегежчи къызчыкъ Мокъаланы Салима Андрей Дементьевни «Ананы юсюнден балладасын», сора орус эм тау тилледе талай назмуну  шатык айтханды. Школчула  Даяна Мафедзова бла Алина Шогенова, Инна Кашежеваны «Господи, какие сны нам снятся», Николай Ковалёв  а Николай Некрасовну «Внимая ужасам войны» чыгъармалары бла шагъырей этгендиле. Назму жазыу бла бирге, аны окъуй билиу да усталыкъды. Жаш адамла анга бары да бирча итиннгенлерин туура этгендиле.

Тюбешиуде энтта да кёп назму окъулгъанды. Къонакъла Улбашланы Келлет жазгъан сёзлеге жарашдырылгъан жырлагъа да тынгылагъандыла.

Быллай жыйылыула, поэзия - адам улугъа эм магъаналы хазналаны тёгерегинде кёплени жыйгъан сау чыгъармачылыкъ болгъанын эсгередиле. Жазыучулагъа, алагъа къулакъ салгъанлагъа да учунуу бередиле.