Мардалагъа келиширча боллукъду

Бу кюнледе "Жашау этерге инфраструктура»  жангы миллет проекге кёре Ташлы-Талагъа баргъан жолну 3,1 километр кесегине тынгылы ремонт этип башлагъандыла. Аны кезиуюнде Ленин атлы ара орамы да жангыртыллыкъды, деп билдиредиле КъМР-ни Транспорт эмда жол мюлк министерствосуну пресс-службасындан.

Сагъынылгъан объектде: мектеп, сабий сад, фельдшер-акушер пункт, элни администрациясы эм почтаны бёлюмю да  орналадыла.

Бюгюнлюкде къурулуш организацияны келечилери  жолну мурдорун кючлерча жумушла бла кюрешедиле. Ол санда болжаллы халда белгиле саладыла, эски  асфальтны кетередиле,   машинала ишден чырмамай  жюрюрча мадар этиледи. 

Жангыртыу ишлени кезиуюнде жауун суу саркъырча быргъыла саллыкъдыла, тротуарла жарашдырыллыкъдыла, кече жарытырча чыпынлы чыракъла тартыллыкъдыла, социал магъаналы объектлени алларын айбатландырлыкъдыла  эм башха жумушла да тамамланырыкъдыла.

Къоркъуусузлукъ жалчытылынырча да  аслам эс буруллукъду. Ол санда темир буруула, жорукъну билдирген белгиле, ызла,  «зебрала» эм башха затла да жарашдырыллыкъдыла.

Саулай алып айтханда, жол мардалагъа келиширча боллукъду. Аны бла бирге  элде жашагъанланы болумларын игилендирирге эм  аварияланы санын да азайтыргъа онг табыллыкъды. 

Планнга кёре, объект быйыл кюз артындан кеч къалмай хайырланыргъа берилирге керекди.