Жигитлени атлары унутулмазча

Бу кюнледе, Излеучюлени битеуроссей кюнюне аталып, Нальчикде Т.Мальбахов атлы  къырал миллет китапханада  «Биз жерден чыгъаргъанларыбызны эсге салабыз» деген  ат бла тюбешиу ётгенди. Анга «Халкъны эси» эмда «Россейни излеу ишле жаны бла  къымылдауу» деген белгили излеу отрядланы  келечилери, СВО-ну ветеранлары  да келгендиле, шахар школланы бла  колледжлени окъуучулары чакъырылгъандыла.

Китапханагъа кирген жерде эмда жыйылыу барлыкъ отоуда Уллу Ата журт урушха, бу кюнледе энчи аскер операциягъа къатышхан жерлешлерибизни суратларындан, китапладан, газет статьяладан эмда сабийле ишлеген суратладан къуралгъан кёрмючле жарашдырылгъандыла.

Китапханада 1941-1945 жыллада Экинчи дуния уруш бла байламлы бёлюмню башчысы Марина Малоусова Уллу Ата журт урушну къужурлугъуну, анга жерлешлерибиз къалай къатышханларыны юслеринден хапар айтханды, шагъатха тарых магъаналы документлени уллу экранда кёргюзтгенди.

Ызы бла излеу отрядланы башчылары кеслерини ишлерини юслеринден хапарлагъандыла, кёп сейир юлгюле да келтиргендиле. «Боевое братство» битеуроссей жамауат биригиуню регион бёлюмюню башчысы Гелястанланы Барисбий а, излеу отрядла бек магъаналы иш тындыргъанларын айтып, юлгюге кёп шартла келтиргенди.

«Ахыр солдат тийишлисича асыралгъынчы уруш бошалмайды» деп бошдан айтылмайды. Алыкъа кёп солдатны аты белгисиз къалып турады. Аланы туура этиу бек магъаналыды, къыралгъа, жууукъ адамларына да, бютюнда бег а жаш тёлюге. Жаш адамла жууукълары этген жигитликни юсюнден билирге, аны бла ёхтемленирге керекдиле. Бизге урушда Хорламны ким келтиргенин унутдурургъа, тарыхны жангыдан жазаргъа сюйгенле бардыла. Алагъа жол бермезге керекбиз. Бир ветеранны айтханы эсимден кетмейди. «Биз ол урушну унутхан сагъатда, ол бизге къайтмай амалы жокъду», - деген эди ол. Аны себепли сизге – жаш тёлюге айтырыгъым: унутмагъыз ол урушну, эсгериуню кезиую сизге ётдюрюлгенди»,- деп, Гелястан улу бу тюбешиуню къурагъан Марина Биляловнагъа ыспас этгенди, жаш тёлюню уа излеучюлеге себеплик этерге чакъыргъанды.

Андан сора КъМР-ни Жамауат палатасыны келечиси, «Боевое братство» биригиуню регион бёлюмюню толтуруучу комитетини таматасы Владимир Абаноков, ол биригиуню регион бёлюмюню ветеранларыны советини председатели Геннадий Колодяжный, Россейде «Халкъны эси» излеу отрядны башчысыны орунбасары Владимир Мосалёв, СВО-ну ветераны Алексей Карамышев да сёлешгендиле.

Владимир Мосалёв а «Халкъны эси» деген излеу отряд белоруслула бла къалай ишлегенини юсюнден айтханды. Устазла, окъуучула да отрядланы къауумлары бла терк-терк тюбеше турургъа кереклисин чертгенди. «Алай бла жаш адамла излеу отрядланы юслеринден бютюн кёп билликдиле эмда белгисиз тас болгъан аскерчилени атларын туура этиуге юлюшлерин къошаргъа боллукъдула», - дегенди.

Тюбешиуню кезиуюнде излеу ишлеге тири къатышхан бир къауумлагъа Т.Мальбахов атлы къырал миллет китапхананы атындан бюсюреу письмола берилгендиле. Аланы алгъанланы араларында Гелястанланы Барисбий да болгъанды. 

Ол кюн Белоруссия бла тюзюнлей телевизор байламлыкъ да къуралгъанды. Анга къатышханла аланы республикаларын немисли фашистледен азатлай жан берген жерлешлерибизни хурметине ишленнген эсгертмени къатында назмула окъугъандыла, РФ-ни Гимнин сокъгъандыла, бир минутну шош сюелгендиле.

Тюбешиуню ахырында излеучюле окъуучулагъа тапхан затларын кёргюзтгендиле. Жаш адамла алагъа уллу эс буруп къарагъандыла, волонтёр болур, излеу отрядха кирир ючюн не зат, къаллай билим кереклисин да соргъандыла. 
Тюбешиу шуёх эмда бир бирни ангылау халда ётгенди.
Эсгертиу: Россейде Излеу къымылдауну кюню 13 мартда белгиленеди. 1988 жылда мартда излеу отрядланы битеусоюз жыйылыулары болгъанды. Анда ВЛКСМ-ни Ара Комитетинде аланы Битеусоюз координация отрядын къураргъа оноу этилгенди.