Тамамланнган жумушла бла шагъырейлендиргендиле

Кёп болмай РФ-ни Илму эм бийик билим бериу министри  Валерий Фальковну башчылыгъы бла ведомствону советини  кенгеши болгъанды. Аны   чеклеринде Къабарты-Малкъар къырал университетни келечилери  «Приоритет - 2030»   деген программагъа кёре былтыр  этилген ишле бла  шагъырейлендиргендиле. 

Бу жол республиканы атындан анга: КъМР-ни  Правительствосуну Председатели  Мусукланы Алий, КъМКъУ-ну ректоруну къуллугъун толтургъан   Юрий Альтудов, «Газпромнефть» биригиуню  илму-техника управлениясыны таматасы  Андрей Клейменов, илму -излем иш жаны бла  проректор  Светлана Хаширова, медицина академияны госпиталь хирургия  кафедрасыны  профессору, Москваны сабий хирургия эм травматология бла байламлы  илму-излем институтуну нейрохирургия  бёлюмюню таматасы  Жанна Семенова къатышхандыла.

- Эсге сала айтсакъ, «Приоритет-2030» стратегиялы программаны чеклеринде КъМКъУ-да аслам магъаналы проект бардырылады. Ол санда билим бериуню жангыртыуда, илму-излем жаны бла ишни айнытыуда да.

Вуз билим бериу бла илму предпринимательство бла байламлыкъда ишлерча эм алчы технологияла къурарча  мадар этеди.   Аны себепли тийишли кадрланы хазырлаугъа да аслам эс бурулады,- дегенди Юрий Альтудов.

Бюгюнлюкде белгилерча жтишимлеге  жангы инфраструктуралары бла арала къуралгъанларын, ол санда къыралда биринчи тау медицина жаны бла клиника илму ара, экология болумну тинтген жаш тёлю илму-излем лаборатория ишлейди. Аны бла бирге  «РФ-ни Пилотсуз авиация системасы» миллет проектге кирген   «Кадры для БАС» федерал программаны бардырады. Дагъыда    финанс модельни айнытыу жаны бла бюджет ахчадан тышында  илму-технология проектлени айнытырча мадар этилгенин, «Газпромнефть-промышленность жангычылыкъла"  партнёрну заказы бла промышленностьха жараулу  бийик технологиялы полимерле чыгъарылгъанларын,   «Регенератив жерчилик»  проектни чеклеринде сабанлыкъланы  семиртгичле бла жалчытхан устройство жарашдырылгъанын да айтырчады. 

- КъМКъУ  полимерледен  материалла къурау жаны сынамлы болгъанын ачыкълагъанды. Бюгюнлюкде  учрежденияны илму жаны бла  жетишимлерин  саулай дуниягъа айтырчады.  Ол илму эм техника жаны бла да къыйын борчланы толтуралгъанын кёргюзтгенди. 

Аны бла байламлы бюгюнлюкде биз «Жангы  материалла эм  химия» миллет проектни чеклеринде  «СВМП эм энчи  полимерле» технология ишни жетишимли бардырабыз.   Былтыр полимерлени биринчи партиясын сынагъанбыз.   Алай бла   2028 жылгъа КъМКъУ-ну   лицензиясы бла сагъынылгъан материалдан жылгъа 200  тонна чыгъарыр муратыбыз барды,- деп къошханды    Андрей Клейменов.