Уста уучу, батыр аскерчи

Хорламны 80-жыллыгъына

Уллу Ата журт уруш кесини ачы ызын къоймагъан тукъум, ююйр, эл-жер къалмагъанды. Таулу жашла да, уллу къыралны кёп миллетлерини келечилерича, кюйсюз душман бла уруш этгендиле, мамыр жашауубуз ючюн жанларын бергендиле. Аланы юслеринден материалланы Гуртуланы Оюс жыйышдыргъанды. Ала бла кезиу-кезиу шагъырей этерге сюебиз.

Огъары Малкъардан Атабийланы Камал фронтха чакъырылгъанда, колхозда малчы болгъанды, аны бла бирге уа ол уста уучу да эди. Бийик тауларындан, сейир ариу ауушларындан къадар аны уруш аулакълагъа къазауат башланнган кезиуде элтгенди. Душман бла биринчи ол Украинада тюбегенди, ызы бла Волгагъа дери ауур сермешлеге къатышханды. Анда малкъарлы жаш жерлешлери Созайланы Мухажирге, Чеченланы Магометге эм башхалагъа жолукъгъанды. Сталинграддан Европаны ара шахарларына батырла ата-бабаларыны – половчуланы, болгарланы жоллары бла баргъандыла. «Сталинградны къоруулагъаны ючюн» майдал бла саугъаланнганындан сора уа, Камалны кюнбатышха узун чабыуулу да башланнганды.

1944 жылны январында Атабий улу къуллукъ этген полк Кюнбатыш Украинагъа жетгенди, борчлары энди Ровно бла Луцк шахарланы азатларгъа эди. Ровно ючюн сермешледе ол  ётгюрлюгюн, душманны ууатыуда таукеллигин да ачыкълагъанды. Мында кёргюзтген батырлыгъы ючюн  «За отвагу» майдал бла белгиленнгенди. Андан сора бир айдан а ол Карпат тауланы тийрелерине жетгенди. 22 апрельде аны аскерчи фахмусуна бийик багъа бичилгенди, ол «За боевые заслуги» майдал бла саугъаланнганды, Дебрецен венгрли шахар ючюн къазауатда жигитлиги ючюн «За отвагу» деген экинчи майдалын алгъанды.

1944 жылны 29 октябринде Камал жаралы болгъанды, алай госпитальда кёп заманнга къалмагъанды, аскерчи нёгерлерине болушургъа ашыкъгъанды. Полкга къайтханлай, Будапешт ючюн сермешлеге къатышханды. Мында таукел батыр ефрейтор эки немисли офицерни жесирге алгъанды, алай бла «За отвагу» ючюнчю майдалгъа тийишли болгъанды. Мартдан башлап урушну ахырына дери Вена бла Праганы къоруулаугъа къатышханды, урушну 1945 жылны 13 майында бошагъанды.

Андан сора уа Къыргъызда кёчюрюлген миллети, юйюрю бла башха жашау башланнганды. Атабий улу Экинчи Дуния урушда кёргюзтген жигитлиги ючюн «За отвагу» юч майдал, «За оборону Сталинграда», «За боевые заслуги», «За взятие Будапешта», «За освобождение Праги», «За победу над Германией», «За освобождение Вены» майдала бла саугъаланнганды. Жангызда 1957 жылда батыр улан юйюрю бла бирге туугъан тауларына къайтханды.