Эл мюлкде этер иш, умут да кёпдю

Республиканы эл мюлк бёлюмюнде,  не замандача, быйыл да малланы санын, тирликни эмда экспортну кёбейтиу, продукцияны жарашдырыу жаны бла этер иш кёп боллукъду. Аны юсюнден эл мюлк министр Хасан Сижажев айтханды.

Жылыу келгени бла эллиле урлукъ себиуге хазыр болгъандыла. Мирзеулюк битимлени урлукъларын 216,5 минг гектарда себерге дейдиле, тахта кёгетлени 17,1 минг гектарда ёсдюрлюкдюле, картофну уа 7 минг гектаргъа саллыкъдыла.

Мюлкле семиртгичле бла жалчытыуну да унутмайдыла; аладан бу кезиуде 36,1 минг тонна керек боллукъду. Дагъыда кёп къалмай 30 минг тонна отлукъ изленирикди.

Малчылыкъ мюлкле да къышдан чыгъып, ишлерин тирилтип башлагъандыла. Быйыл ал эки айны ичинде, озгъан жылны ол кезиую бла тенглешдиргенде, 4,8 процентге кёп (15,8 минг тонна) эт эмда 3,1 процентге аслам жумуртха (28 миллион) чыгъаргъандыла. Эл мюлк продукцияны бар тюрлюлеринден 4,69 миллиард сом багъасына (+1,4%) жарашдырылгъанды.

Аш-азыкъ эмда жарашдырыучу промышленностьлада да болум игиди: биринчисинде 22,7 процентге аслам продукция чыгъарылгъанды, сууланы производствосу уа 236 процентге жетгенди.

«Эл тийрелени комплекс халда айнытыу» республикалы программаны хайырындан талай муниципалитетде быйыл да мадар этилликди. Ол санда былтыр башланнган ишле эбине жетдирилликдиле, сёз ючюн, Тырныауузда спорт школну эмда сабий чыгъармачылыкъ араны, сора Псыхурейде Маданият юйню ремонтлары. Дагъыда Баксанёнок элде сабий садны эмда физкультура- саулукъландырыу комплексни къурулушлары башланырыкъды, ветеринар клиника ишленирикди, 11,5 километр суу ызла жангыртыллыкъдыла эмда сабийлеге ойнар майданчыкъ хайырланыугъа берилликди.

Къашхатауда «Бабугент-Къара-Суу -Къашхатау» суу ызны къурулушу башланырыкъды; аны келир жылны ахырында битдирирге умут барды.

Бизни республика быйыл «Эл тийрелени тапландырыу» деген регион проектге биринчи кере къатышырыкъды. Аны чеклеринде Псыхурейни ара паркында, Псынадаха элни майданында, Аушигерни скверинде мадарла этилликдиле.

«АПК-да кадрла» федерал проектге къатышып, 2027 жылны ахырына дери Къабарты-Малкъар къырал аграр университетни мекямына тынгылы ремонт этилликди; анга 1,42 миллиард сом къоратыллыкъды.

Эл мюлкде къармашханлагъа къырал быйыл да болушлукъ берирге умутлуду. Тийишли келишимни чеклеринде Къабарты-Малкъарда АПК-ны айнытыугъа 4078,7 миллион сом къоратыллыкъды. Ол санда 3919,7 миллионун федерал бюджетден, къалгъан кесегин а республиканы бюджетинден жиберликдиле.