Аты китапха киргенди

Мусукланы Исмайылны жашы Рамазанны юсюнден жаза, Гуртуланы Оюс аны аты айтылгъан китапны юсюнден билдиреди. «Къабарты-Малкъарны аскер махтаулугъу» деген экинчи китапда (Нальчик, 1966г.) Л. Федикни «Под Берлином» деген статьясында связист, Огъары

 

Малкъардан танк аскерлени ефрейтору Мусукланы Рамазанны юсюнден былай жазылады: «…Энди жашап башлагъан жаш адам, школну бошап, колхозда эсеплеучю болуп бир кесекни ишлегенлей, уруш башланнганды. 1941 жылны кюзюнде ол танкланы тыйгъан уруланы къазгъанды, артда уа къазауатха чакъырылгъанды. Батайск, 142-чи атдырыучу бригада, радиобатальон. Ызы бла уа сермешле… Краснодар, Новороссийск, Каховка, Кърым, Херсон, Слуцк, Барановичи, Брест… Бусагъатда ол Берлинден къыбыла-кюнчыгъыш жанындады,

жууукъ заманда уа уруш да бошаллыкъды. 

 

Гвардияны старшина Серденчик, телефоннга къарай: «Связь тыйылды», - деп къычырды. Командир гвардиялы майор Кобзов: «Мусуков! Линиягъа бар!» - деп буйрукъ берди.

Рамазан, аппаратны, кабельни жартысын сермеп, жер тюбюнде гитыдан чабып чыкъды. Тышында уа танкла бир бири ызларындан тизилип барадыла, аланы тюплерине тюшерге къоркъуу, айхайда, уллуду. Болсада, жигит жаш алагъа, окъланы шууулдап тёгюлгенлерине, атылгъан миналаны жютю кесеклерине арталлыда эс бурмагъанлай, бир юйден бирсине чаба эди. Ол кабельны ызы бла барады, аны кесилген жерин да табады. Тюз да аны къошханлай, жууукълаша тургъан немислилени эследи. Не этгин? Мычымай автоматына узалды, олсагъатлай а «катюшаладан» атдырдыла, артиллерия да къошулду. Алай башындан ёргерекде снаряд атылды: «А-а, чёрт!» - деди ичинден Мусук улу, эсин ташлай. Кесине келгенде уа, къатында жаралы немисли жатып. Болумну терк ангылап, фашистни сауутларын алды. 

 

Мусукланы Исмайыл уруш жолун Кавказ ючюн сермешледен башлап, Берлиннге дери жетгенди, Къызыл Жулдузну ордени, «За отвагу», «За взятие Кёнигсберга», «За взятие Берлина», «За победу над Германией» майдалла бла саугъаланнганды. Туугъан жерине къайтханындан сора, элинде колхозда агъач уста болуп ишлегенди».