Элни суу басхандан къутхаргъандыла

Россейни МЧС-ни КъМР-да Баш управлениясы команда-штаб юйрениуле бардыргъанды. Ол Битеуроссей юйрениулени чеклеринде ётеди. Аны кезиуюнде ведомствону къыйын болумлагъа хазырлыгъын тинтедиле, тийишли багъа бичедиле.

Юйрениуле эки кезиуге бёлюнюп бардырыллыкъдыла. Геуюрге кюн, аны биринчи кезиуюнде, энчи составны жыйылыуу болгъанды. Анда аланы алларында салыннган борчланы ангылатхандыла. Дежурный эм диспетчер службаланы хазырлыкъларын сынагъандыла. Дагъыда аэромобиль къуумны къыйын болумлагъа чыгъаргъа терклигине эс бёлюннгенди.   

Бу жолгъу юйрениулеге башчылыкъ Россейни МЧС-ини КъМР-де Баш управлениясыны таматасыны орунбасары Аналаны Магомет таматалыкъ этгенди.

- Мында биз регионда болуучу къыйын болумлагъа кёре, юйрениулени алай бардырабыз. Къутхарыула дагъыда аварияла бла байламлы жангыртыу ишле бла да байламлы боладыла. Быллай жумушланы кезиулеринде халны, онгларыбызны да толу ангылаялабыз, - деп чертгенди Магомет Азретович.

Алай бла, таурухха кёре, жаз башында Нальчик черек кётюрюлюп, жагъасындан чыгъып, тёгерекни басханды. Энчи уа -Хасанияны. Керекли кенгешле бардырылгъандан сора, къутхарыучула ишлерин башлагъандыла. Анда жашагъанлагъа къыйын болумну юсюнден билдиргендиле. Ары тийишли техника бла специалистле тебирегендиле, ол санда Ич ишле министерствону келечилери, терк медицина болушлукъ тапдыргъан служба да.

Битеу да бу жолгъу юйрениулеге 398 адам къатышхандыла эм 120 техника хайырланылгъанды. Аладан 199 адам къутхарыучула эдиле.

Юйрениулени экинчи кезиуюнде уа от тюшюуден сакъланыуну амалларын тинтирикдиле.