Жашаулары туугъанларына, туудукъларына да юлгю

Уллу Хорламны белгилеу бла байламлы «Хорламгъа сексен жыл» деген майдалланы Кёнделенде тылны ветеранларына бергендиле.

Жарсыугъа, элде ветеранла къалмагъандыла. Алай урушну къыйын жылларында алыкъа сабийле болсала да, Хорламны келтирирге къолдан келгенни аямай кюрешген инсанла уа бардыла. Бийик тау элде аллай тогъуз жигит жашайдыла. Сыйлы жумушну Элбрус районну башчысы Отарланы Мухтар толтургъанды.

Жашууланы Исхакъ майдалла алгъанланы санындады, ол тогъуз жылында атадан ёксюз къалгъанды, къыркъ тёртюнчю жылда фашистле Кёнделеннге чабыуул этгендиле, самолётладан окъла жауунча тёгюлгендиле. Исхакъ бла атасы жолда бара тургъанлай, тюз да алларында снаряд атылгъанды. Атасы гитче жашчыгъын бир жанына тюртгенди, алай кесини жашауу уа алайда юзюлгенди. Алай бла алыкъа сабий жашчыкъ замандан алгъа абадан болгъанды. Бир айдан миллет бла бирге Жашууланы юйюр да Къыргъызстаннга кёчюрюлгенди.

Исхакъны келини Жанна айтханыча, ала беш эгеч бла тёрт къарындаш болгъандыла, жашладан тамата Исхакъ эди. Гитчелеге болушурча, ол колхозгъа ишге киргенди, социализм эришиуледе кёп кере хорлагъанды, аладан саугъалау къагъытла сакъланнгандыла. Туугъан жерине къайтханлай а ол кёп жылланы Тырныауузда вольфрам-магъадан комбинатда шахтёр болуп ишлегенди. Бюгюнлюкде ол сабийлерини, туудукъларыны тёгерегинде, алагъа адамлыкъны, жигерликни, иш кёлллюлюкню ариу юлгюсюн кёргюзте  жашайды.