Ишчи усталыкъланы даражаларын кётюре

Колледжлени окъуучуларыны араларында ётдюрюлген «Устала» деген эришиуню регион кезиую бошалгъанды, хорлагъанла дипломла бла саугъаланнгандыла. 

Сварка этиучюлеге, станокланы операторларына, дизайнерлеге, веб-усталагъа эм башха ишчи усталыкълагъа къыралыбызда бусагъатда сурам уллуду. Бу чемпионат а аланы даражаларын ёсдюрюрге, быллай усталыкъланы сайлагъанлагъа кёллерине жетерча иш табаргъа себеплик этеди. «Эришиуге тёрт колледж къатышхандыла. Эсеплеге ыразыбыз, отуз жети инсандан аны федерал кесегине сегизеулен ётгендиле», - дегенди Къабарты-Малкъар къырал университетни орта усталыкъ билим бериу бёлюмюню башчысы Мадина Таова.

Эришиуге къатышханла Александра Курочкина бла Мурзаланы Диана хорлагъанланы араларындадыла. Ала экиси да башланнган классланы устазлары эм сабий садда юйретиучю деген бёлюмде фахмуларын кёргюзтгендиле. «Манга бу эришиуде кесими сынагъан бек сейир эди. Чемпионат сейир ётгенди, сабийлени юйретген, айхай да, хычыуунду. Бу усталыкъны да гитчеле бла ишлегени бек жаратханым ючюн сайлагъанма», - деп белгилейди Александра. Диана уа былтыр да биринчи жерни алгъанды, ол анга Оренбургда сынашыргъа эркинликни бергенди. Алай, анда ал тизгинлеге киралмагъанды. Быйыл Диана хорлам бла къайтыргъа таукелди. Стоматология жаны бла хорлагъан Иналуко Тлеужев да бу усталыкъгъа жюреги тартып келгенин айтады, мында ол бу ишге къолу жарашханын баям этгенди, кёп жангы зат да билгенди.

Эришиу «Профессионалитет» федерал проектни чегинде къуралады, эм изленнген усталыкълада ишчилени табаргъа болушады.