Билимлери болгъан экскурсоводла ишлерикдиле

Курортла эм туризм министерствода экскурсоводланы бла гидлени аттестациясы къыстау барады.

Бу жол сынауланы ётерге отуз адам келгенди, ала бизни республикадан, Шимал Осетиядан бла Ставрополь крайдандыла. Ала асыры кёп болгъандан, эки къауумгъа юлеширге тюшгенди.

Аттестация комиссияны башчысыны орунбасары Виолетта Каскулова эсгертгенича, быйыл мартдан башлап жангы жорукъла кийириледиле. Алагъа кёре, бу усталыкъда къалыргъа сюйген экскурсоводла, гидле эм гидле-тилманчла борчлу халда аттестацияны ётерге керекдиле, ансыз ишлерин бардырыргъа эркинликлери боллукъ тюйюлдю. Сёз ючюн, Ставрополь крайдан Тамара Сапежникова бу жумушну асыры кёпге созгъанын, адамланы Минги таугъа жолоучулукълагъа элтиучюсюн, энди уа сынауланы ётмесе, сюйген ишинден айырылыргъа тюшеригин билдиреди. Алгъа ала эки сагъатны ичинде тестлени ётедиле, анда отуз соруу барды, ызы бла соруулагъа кёлден жууапла бередиле.

Сынауланы тийишлисича ётгенлеге биргелерине жюрютюрча белгиле берилликдиле, сора аланы атлары тизмеге кийирилликди. Бюгюнлюкде республикада аттестацияны ётген жюз бла жетмишден аслам экскурсовод ишлейдиле.