Хыйлачыла къалай алдайдыла?

Сакъ болугъуз! Хыйлачы телефон бла сёлешип, кесин Социал фондну адамыча танытыргъа кюрешип, абадан адамгъа аны эсепге тюшмей къалгъан ишчи стажы болгъанын айтады. Аны жангыдан тергерча заявка берилсе, пенсиягъа ай сайын къошакъ ахча тёленирикди, алгъын жылла ючюн а компенсация берилликди деп алдайды.

Абадан адамгъа аны барын да айта кетип, хыйлачы ол жумушну ары-бери бармай, тюзюнлей телефон бла этерге онг болгъанын билдиреди. Аны ючюн а банк карточканы номерин эмда смс бла келлик кодну айтырын излейди. Пенсиячы аны этсе, счётунда болгъан ахчадан къуру къаллыкъды!

Кертиси къалайды? Социал фондну ишчилери пенсияны тергеу неда тёлеу бериу жумушла бла адамлагъа сёлешмейдиле. Аны банк карталарыны номерлерин, смс-кодланы уа бютюнда сормайдыла!

Хау, къагъытларын излерге боллукъдула неда ахчаны кёчюрлюк счётну номерин. Алай ол бары да адам Фондну бёлюмюне кеси барып, ишчилери бла бетден-бетге тюбешип, ушакъ этсе.

Хурметли жамауат! Сизге биреу сёлешип, кесигизни юсюгюзден информация, картаны номерин, смс-кодланы соруп башласа, олсагъат телефонну салыгъыз. Пенсияны юсюнден абери билирге сюе эсегиз а, МФЦ-гъа неда Социал фондха барыгъыз. Сюйсегиз а, экинчисини сау кюн ишлеген номери бла сёлешигиз: 8 800 100-00-01.