Газетлени сатып алыргъа жарарыкъды

«КБР-Медиа» холдингге кирген газетлени энди сатып алыргъа жарарыкъды.

«Кабардино-Балкарская правда», «Заман», «Адыгэ псалъе», «Советская молодежь», «Горянка» - аланы эндиге дери жангыз да жазылыу бла алыргъа жарагъанды. Бусагъатда аланы Нальчикде тёрт жерде - ара базарда, Пушкин атлы орамда газет киоскда, «Вестер» эм «Дея» аралада - сатып алыргъа боллукъду, быллай жерлени саны кёбейтилликди.

КъМР-ни Цифралы анытыу министри Аскер Бозиев чертгенича, аслам информация органла бла байламлы халкъгъа билдириуле этиуню игилендирир муратда тюрлениуле болгъандыла. «Бусагъатда адамла кёп жангылыкъланы социал сетьледен, интернетден билгенлерин ангылайбыз, аны ючюн бу жаны бла айныр умутлубуз, алай аны бла бирге тёрели газетлеге да тийишлисича эс буруллукъду», - дегенди министр.

Ол а абадан тёлюге магъаналыды, таматала газетлени окъургъа сюедиле, аланы жангы чыкъгъанларын ашыгъып сакълайдыла. Алгъа жыллада телефонла болмагъандыла, хар ким да газетлени окъугъанды. Бусагъатда хал тюрленнген эсе да, газетни къолгъа алып окъургъа сюйгенле – абаданла, жашла да бардыла. Жашыракъла келселе, юйюрде абаданлагъамы аласыз деп сорсам, угъай, кесим окъургъа сюеме, деп жууаплайдыла, дейди газетлени отуз жылны сатхан Александр Вдовиченко. Электрон халда окъугъан тынчыракъ болса да, кёпле керти зауукълукъну къагъыт газетни ачып окъусала табадыла.