Бал суу

15 марта, 2025 - 07:37
Залкъуф  къатын алыр жыл  саны келген  хайт деген жаш  анасы бла кеси тау эллерибизден биринде жашайды. Ара мюлкде  агъач жаргъан жерде урунады. Машинала бла келтирип къотарып кетген уллу томуроуланы нёгерлери бла быхчыда жарадыла. Къангаларын  башы жабылгъан жерге жыядыла. 
 
Ишге эрттенликде кетип, ингир ала юйге арып-талып жыйышады, ушхууурдан сора бираз телевизоргъа да къарайды, андан сора тынчаяды. Экинчи кюн а  жангыдан ишге тебирейди. Жашауу алай барады. 
Бир ингирде анасы жашны ишден хумжу хычинле биширип сакълайды. Чёмюч бла зынтхы боза да барды столда. Залкъуф аладан ашап-ичип, тапчаннга таянады. 
 
  Бир газетни къолгъа алып, аны къыстау окъуйду. Баштёбен да бурады, ёрге да сюейди, сора сейирсинип башлайды. «Оллох, оллох, къара бу тамашагъа, аламатха. Жомакълада окъуна  эшитмегенме мен быллай зат», -дейди. 
Бираз турады да, кёз  къыйырын анасындан кетермейди. Жангыдан газетни ичине, тышына да къарайды. Дагъыда ол сёзлени къайтарып айтады. 
Анасы уа чындай эше тура эди да, ийнелерин, халысын бир жанына салып,: «Ай  жаш, неди бу этгенинг? Сен быллай бир сейир этерча не зат жазылады анда?» – деп сорады.
 
-  Анам, жомакълада окъуна  эшитмегенме быллай сейирликни. Мында айтылгъан керти эсе, мияла орун бла балны уругъа салса, бираздан ол суу болуп къалады, дейдиле. Ийнанмайма мен анга, ётюрюк болур. Алай  быллай уллу, сыйлы газетде ётюрюкню къалай жазарла, - дейди. 
 
Сора газетни бир жанына салып, эсин телевизоргъа бурады. Дагъыда: «Сейир, тамаша, ким кёргенди бал суу болуп. Алай дуния тюрленнгенди. Хауа да алгъынча тюйюлдю»,- деп, телевизоргъа аралып къалады. 
Залкъуф сёзюн бошар бошамаз, анасы, артыкъ таууш этмей, тышына чыгъады. Сора бираздан, ичи суудан толу ючлитрлик мияла банканы алып келеди.
 
– Жашым, кертиси бла да, дуния тюрленнгенди. Жашаудан  жашдан къарт болдум, биринчи кере кёрдюм балны суу болуп, - деп жарсып, тышына чыгъып кетеди.
Иш а былай болгъанды. Жашны анасы базаргъа барып, юч литр бал бла къара турмала алып келгенди. Къышда ауругъан, жётел этген болса, анга дарман этерге деп. Залкъуф,  аны кёрюп,   анасындан бугъуп, уругъа тюшюп, балны аз-аз ичип тауусады. Орунуна уа суу къуюп къояды.
 
Анасы экинчи кюн  базаргъа биягъы барып,  ол орун бла бир жангыдан  бал келтиреди. Энди подвалгъа салмай,  банканы стол юсюнде къояды. Алай ол бал да  кюнден-кюннге аздан-аз бола барады. Залкъуф айтханнга кёре, жарыкъда уа  бал  къуругъан этеди! 
Османланы Хыйса.
  • 11 просмотров
Поделиться: