Кёчгюнчюлюк сынагъан тёлюню суратлары

Кёп болмай ачылгъан Жаш тёлюню юйюнде бу кюнледе кёчгюнчюлюкге аталып Хубийланы Мариканы «Вопреки» деген аты бла сурат кёрмючю болгъанды. Анда малкъар халкъны тыш жерге кёчюрюлгенлерини суратлары кёргюзтюлгендиле. Халкъ къаллай къыйынлыкъ сынагъаныны тарыхда ол да бир кесегиди.

Жаш тёлю бла тюбешиуде «Минги-Тау» журналны редактору Додуланы Аскер анасыны юйюрюню юсюнден айтханды. Бир юйюрден тёрт къарындаш – урушда, аланы юйюрлери уа – кёчгюнчюлюкде. Кёргенлерине да къарамай, миллетни акъсакъаллары алгъыш этселе, энди быллай къыйынлыкъны киши да сынамасын деп, къатлагъанлай турадыла. Ёсюп келген тёлю, этилген артыкълыкъны да унутмай, мындан ары мамыр жашау этерге керегин чертгенди ол сёзюнде.

Жаш тёлюню ишлери жаны бла министрни къуллугъун толтургъан Ахметланы Артур жыйылгъанланы аллында сёлеше, былай дегенди:

- Миллетге кёчгюнчюлюкде къалай къыйын болгъанын таматала айтдыла. Бу кёрмючде суратладан къарагъанла кёчгюнчюлюкню азабындан сау чыкъгъанладыла. Халкъыбызда болгъан игиликни бир тёлюден башхасына, тас этмей, ётдюргенле бу тёлюдюле. Жаш адамла кёчгюнчюлюкню азабын сынагъанланы эсибизде тутаргъа керекбиз. 

Кёп функциялы жаш тёлю араны директору Азамат Дзагаштов кёчгюнчюлюк таулуланы ёхтемлиликлерин, адамлыкъларын, иш кёллюлюклерин сындыралмагъанын белгилегенди. Быллай кёрмючлени хайырындан жаш адамла озгъан ёмюрню 40-чы жылларында жерлерин тапхан терс ишлени юсюнден хапарлы болгъанларын да чертгенди ол.

«Нюр» журналны баш редактору Сабанчыланы Арипа кёрмючню къурагъан Хубийланы Марикагъа жюрек ыразылыгъын билдиргенди. Сора кёчгюнчю миллетлеге Орта Азияда бла Къазахстанда къаллай къыйынлыкъла сынаргъа тюшгенин да эсгергенди. Алай ала анда жигер ишлегенлери ючюн орденле, майдалла алгъанларын чертип, Арипа эндиги тёлю керти тарыхны билирге кереклисин да айтханды.

Энчи аскер операциягъа къатышхан ветеран Гелястанланы Аслан а, таматала айтханнга къошар кереги болмагъанын белгилеп, кёчгюнчюлюкню тарыхын унутмазгъа чакъыргъанды. 

Жаш тёлю да кёрмючде суратлада кеси жууукъларын танып, бир бирине хапар айта эди.