Ыспас сёзле эмда гюлле

Озгъан  байрым кюн  Нальчикде Къырал  Музыкалы театрда Тиширыуланы халкъла аралы кюнюне жораланып концерт  болгъанды. Ол кюн ары чакъырылгъанла сурат кёрмючге эмда сабийле ишлеген аберилеге  да эс бурмай къаллыкъ тюйюл эдиле.

Байрамгъа чакъырылгъанланы араларында  урушну, урунууну да ветеранлары, устазла, врачла, социал ишчиле эмда энчи аскер операциягъа къатыша тургъан аскерчилени аналары, эгечлери, юй бийчелери да бар эдиле. 

Бек алгъа сахнагъа КъМР-ни Башчысыны Администрациясыны таматасы Мухамед Кодзоков чыгъып, регионну оноучусу Казбек Коковну алгъышлау письмосун окъугъанды.

Ызы бла келгенлени КъМР-ни Тиширыуларыны союзуну таматасы, РФ-ни эмда КъМР-ни сыйлы врачы Аулият Каскулова алгъышлагъанды. 

Сахнагъа, бир бирин алышындыра, республикада атлары айтылгъан жырчыларыбыз Текуланы Амырбий, Султан Хажироков, Жаболаны Зарема, Астемир Макоев, СВО-гъа къатыша тургъан Заур Атласкировну юй бийчеси Алёна, «Балкария» эмда «Кабардинка» тепсеу ансамбльле, «Терк къазакъла», «Арабески», «Каллисто» жыр-тепсеу къауумла, дагъыда кёп башхала къонакъланы кёллерин алгъандыла. 

Сахнагъа СВО-ну ветераны Роман Коваленко чыкъгъанда уа, анга барысы да къарсла бла тюбегендиле. Ол Константин Симоновну «Мени сакъла» деген белгили назмусун окъугъанды. Роман кеси да фронтдан жаралы болуп къайтханды, бюгюнлюкде уа  башха жашлагъа  аягъы юсюне турургъа, тамблагъа кюннге ышаныулу къараргъа къолундан келгенича  болушады.

Ол ингирде Халкъла аралы черкес ассоциацияны президенти Хаути Сохроков, «Ата журтну къоруулаучулары» фондну регион бёлюмюню башчысы Муаед Дадов, жазыучу эмда журналист Виктор Котляров, Али Шогенцуков атлы Къабарты драма театрны баш режиссёру Басир Шибзухов, дагъыда башхала тиширыуланы алгъышлагъандыла. 

Ахырында эр кишилени хору «Тиширыулагъа гюлле саугъа этигиз!» деген жырны айтханды. Сора келген тиширыуланы барысына да гюлле берилгендиле.