«Кавказ къонакъбайлыкъны кесибизде сынадыкъ»

«Россей» «Кавказ къонакъбайлыкъны кесибизде сынадыла» кёрмючде республикабызгъа къонакъгъа келирча жамауатны арасында эришиу бардырылгъан эди. Анда  Елена Грушецкая хорлагъанды. Ол «Нарзанла таласы» санаторийде солуп кетгенди. 

Кёрмючде Къабарты-Малкъарны кюнлери бардырыллыкъларыны юсюнден тиширыу «Доброе утро» бериуде кёргенди. Алгъа умуту къыралыбызны регионлары бла шагъырейленирге, кёрмючге къараргъа эди. Келгенинде, республикабызны маданият эсгертмелерини суратлары, алмалары да болгъан стенди сейир кёрюннгенди. Анга къарай, Курортла эм туризм министерствону келечилери бла ушакъны кезиуюнде регионнга жолоучулукъгъа барыргъа сертификатлагъа эришиу боллугъуну юсюнден да билгенди. Айтылгъан кюн келип, сёзберге жууапла бергенди, купонну толтуруп, оруннга салгъанды, лотереяны кезиуюнде уа ведуший аны къагъытын чыгъаргъанды. 

Алай бла Елена жашы Вадим бла Нальчикге келгенди. «Нарзанла таласы» курортну эм эрттегили санаторийлеринден бириди, анда адамланы саулукъларын тюзетиуде кёп жылланы ичинде жыйылгъан сынам, шёндюгюлю амалла да хайырланыладыла. Мында къонакълагъа жарыкъ тюбегендиле, алагъа врач къарагъанды эм багъыуну жазгъанды: медицина процедурала, жолоучулукъла, жюзюу, багъыу аш-азыкъ, сора шахаргъа сейир экскурсия да къуралгъанды. Мында солугъан кюнлерин эсгере, Елена хар нени да жаратханларын билдиргенди. «Кавказгъа биринчи кере келгенбиз, аны ючюн бек кючлю сезимлени сынагъанбыз. Хар не да бек ариу эди, табийгъат - тамаша, саулукъ кючлеуде - кючлю онгла, татлы ашарыкъла, адамла уа - жарыкъ. Кавказ къонакъбайлыкъ не болгъанына, керти да, тюшюннгенбиз», - дегенди ол. Вадим а шахарыбыз таза, жашил болгъанын белгилегенди. «Хауа алай тазады, эрттенликде уяныргъа болушады, эсенлик береди, кечеге уа ырахат этип, жукълатады. Минги тауну деменгилигин а сёз бла айтырча тюйюлдю, ол кесинде табийгъатны къарыуун бла ариулугъун бирикдиреди», - деп жазгъанды ол социал сетьлеринде. 

Къонакъла, таулагъа барып, Огъары Малкъарны тарых эсгертмелерине, Чирик кёллеге да къарагъандыла, концертледе болгъандыла. Алагъа бу жолоучулукъланы Курортла эм туризм министерство бла санаторийни администрациясы къурагъандыла.   

Эсигизге салайыкъ, «Россей»  кёрмюч Москвада 2023 жылны ноябринден башлап былтырны июлюна дери баргъанды, анда къыралны регионларыны ахыр онжыллыкъда жетишимлери кёргюзтюлгендиле. Сурат tourister.ru сайтданды.