Къабарты-Малкъар Республиканы Башчысы К.В. Коковну республиканы жамауатына чакъырыу сёзю

Багъалы жерлешлерим!

Малкъар халкъ туугъан жеринден зор бла кёчюрюлген кюнден бери 81 жыл озгъанды. Ол кюйсюз оноу зорлукъну бла законсузлукъну белгиси болгъанлай къалады, Къабарты-Малкъарны тарыхында бек бушуулу кезиулеринден бирича ыз къойгъанды. Кёплени туугъан жерлеринде жашаргъа, урунургъа да эркинликлери сыйырылгъан эди. 

Гитче ата журтдан узакъда, тыш жерде жашагъан халкъгъа къаллай уллу зарауатлыкъ эмда ачыу сынаргъа тюшгенин акъылынга келтирирге окъуна къыйынды. Сау миллетге уллу азап сынаргъа тюшгенди. Жууукъларын бла ахлуларын тас этмеген хазна юйюр болмагъанды.

Алай не уллу къыйынлыкъ сынагъан эсе да малкъар халкъ, къадарына тарыкъмагъанды, тюнгюлмегенди, сау къалгъанды.  Ауур акъыллылыкъ, чыдамлыкъ, ниет чыныгъыулукъ, тюзлюк хорларыгъына ийнаныулукъ анга битеу къыйынлыкъланы хорларгъа болушхандыла. Аны къой – ол миллет энчилигин, тилин, адет-тёрелерин, маданиятын, ниет хазналарын сакълаялгъанды. Бюгюнлюкде алгъа таукел атлайды, Къабарты-Малкъарны бла битеу Россейни кёп миллетли халкъларыны къарындаш юйюрюнде тамблагъы къадарын къурайды.

Бизни кючюбюз бирликде, бир ниетлиликде болгъанына ишексизме. Анга таянып, не уллу къыйынлыкъланы да хорларгъа, туугъан республикабызда, саулай деменгили къыралыбызда да ырахат жашау къурар, аланы айнытыр муратда белгиленнген борчланы бет жарыкълы толтурургъа къолубуздан келмей къаллыкъ тюйюлдю.