Башламчылыкъларын бардырырча - ангылатыула

Жаш тёлюню юйюнде «Биринчилени атламларыны» грант эришиуюне аталгъан жыйылыу болгъанды.

Анга заявкала жиберген жаш адамла келгендиле, аланы сорууларына жууапла бере, къымылдауну регионда бёлюмюню башчысы Аслан Шипшев бюгюнлюкде тири адамлагъа башламчылыкъларын жашауда толтурургъа кёп тюрлю онгла тапдырылгъанларын чертгенди. «Жангызда ала бла тийишлисича хайырлана билирге керекди. Сиз кётюрген соруула сабийлени бла жаш адамланы айнытыргъа, аланы жамауат жашаугъа къатышыргъа сейирлери болурча этерге болушурукъду», - дегенди ол.

Грант эришиу жыл сайын къыралны битеу регионларында да бардырылады, аны мураты жаш тёлюню башламчылыкъланы аслам этерге кёллендириудю, аланы тёрели тин-ниет хазнабызны, журтубузну сюерге кёллендириудю. Аланы проектлерин толтурур ючюн а, бир миллиарддан аслам ахча бёлюннгенди.