Ётмек биширген предприятиягъа – жюз жыл

Май районда ётмек биширген  предприятие (ХПП) эм эрттегиледен бирине саналады.  Бу кюнледе  ол 100-жыллыгъын белгилегенди.  Аны бла байламлы байрам "Россия" деген Маданият юйде ётгенди. Ол кюн  къонакъла шагъырейленирча,  биригиуню продукциясындан кёрмюч да къуралгъанды, деп билдириледи Май районну администрациясыны пресс-службасындан. 

Къууанчлы жыйылыуну ача, предприятияны  таматасы, КъМР-ни эл мюлкюню сыйлы ишчиси Юрий Колесников хал къалай къуралгъаныны, кёп жылланы ичинде  жетишимли ишлеп  келгенини, анда  сынамлы ишчиле уруннганларыны   юслеринден хапарлагъанды. 

Байрамгъа  келген сыйлы къонакъланы санында  КъМР-ни Правительствосуну Председателини биринчи орунбасары  Сергей Говоров, КъМР-ни Парламентини комитетини таматасы Артур Текушев, эл мюлк министрни орунбасары Тимур Вадахов, Жамауат палатаны председатели  Хазратали Бердов эм  «Кабардинский» крахмал заводну таматасы  Залим Урусмамбетов болгъандыла.  Ала бирден  предприятияны республикагъа магъаналылыгъын чертгендиле эм айырмалы ишчилени да саугъалагъандыла. 
Май районну  администрациясыны башчысы  Татьяна Саенко предприятие не заманда да власть органла бла тири байламлыкъ жюрютгенин, къыйын кезиулеге да къарамай,  кёп жылланы ичинде борчун тынгылы толтургъанын айтханды эм 

администрацияны атындан ишчилеге сыйлы грамотала бергенди. 
Тюбешиуде биригиуню социал бёлюмге къошумчулугъуна  да эс бурулгъанды.  Ол санда къолайсыз юйюрлеге дайым болушханы,  жамауат организацияла бла байламлыкъ жюрютгени,  энчи аскер операциягъа къатышханлагъа гуманитар жюк жибериуге да тири къатышханы ючюн    ыспас этилгенди. 

Пятигорск эм  Черкесск  епархияны Нальчик округда    благочинныйи Валентин Бобылёв а  юбилейни Уллу Хорламгъа 80-чи жыл толгъан кезиуге тюшгенин да энчи  белгиге санагъанды. Ётмек биширген предприятияны жашауу район бла байламлы болгъанын, 1989 жылдан бери анга  Колесниковланы тукъумлары жетишимли башчылыкъ этип келгенлерин да белгилегенди.  

Жыйылгъанлагъа  концерт да кёргюзтюлгенди. Май районну, Прохладныйни бла  Нальчикни артистлери жырлап, тепсеп,  къараучуланы кёллерин алгъандыла.  

Ахырында жандауурлукъ лоторея да  ойналгъанды. Жыйылгъан ахчагъа уа  энчи аскер операциягъа къатышхан жерлешлерибизге абериле алынырыкъдыла.