Жерни чеклерин тюшюрюуню юсюнден

ЕГРН деп жеринден тепдирилмеген мюлкню бирикген къырал реестрине айтадыла. Битеу жер участкаланы чеклери анда болургъа керекдиле. Аны этер ючюн а, Росреестрге межевой планны эмда кадастр эсепге салыннганыны юсюнден заявленияны берирге тийишлиди, дейдиле Къабарты-Малкъарны МФЦ-сында.

Межевание (чеклени тохташдырыу) бла кадастр инженерле кюрешедиле. Аны бла келишим этилгенден сора ол,  жерине барып, битеу тергеулени этеди. Хуна бар эсе, чек аны юсю бла барады. Аллай зат жокъ эсе уа,  жер юлюшню мюйюшлерин таякъчыкъла уруп кёргюзтюрге боллукъду. Ызы бла тергеуле къалай этилгенине къарап, къоншу участкаланы иелери бла да келиширге керекди.

Межевой планны кадастр инженер келишимде жазылгъан заманнга кёре  хазырлайды. Анда участканы чеклерини юсюнден толу информация кёргюзтюледи. Аланы уа жерни иеси сюйгенича этер амал жокъду. Нек дегенде, бу ишни башлар ючюн, ол участка алайда болгъаныны, аны уллулугъуну юсюнден документле керек боллукъдула.

Росреестрни специалистлери айтханларына кёре, участканы чеклерин жик жиги бла тохташдыргъан кезиуде, аны башха шартланы да эсге алып этерге керек боллукъду. Бу ишни болжалы уа жеринде болумуна кёре болады, бир заман бла чекленмейди кеси да.

Чеклени жик жиги бла тохташдырсагъыз, ызы бла чыгъаргъа боллукъ кёп тюрлю чурумладан, ол санда жерни уллулугъу бла байламлы болгъанладан да къутуллукъсуз. Бу шарт ЕГРН-де кёргюзтюлгенден башхаракъ болургъа боллукъду. Дагъыда  участканы уллулугъу терс тохташдырылса, аны кадастр багъасы да тюрленирикди, анга кёре уа жер налог да башха боллукъду. Бу жумушланы бары да «Кадастр ишлени юсюнден» эмда «Жеринден тепдирилмеген мюлкню юсюнден» федерал законла бла тийишдириледиле.

Жер участканы чеклери ЕГРН-ге тюшгенин билирге сюе эсегиз, Росреестрни ачыкъ картасына къарагъыз. Ол интернетде барды. Ары кирип, участканы кадастр номерин жазсагъыз, ол аны юсюнден (уллулугъу, кадастр багъасы, къалайда болгъаны) тийишли информацияны сизге кёргюзтюрюкдю. Сюйсегиз а,  бу информацияны ЕГРН-ден электрон неда къагъыт выпискада алыргъа боллукъсуз. Аны уа Госуслуги порталда неда МФЦ-да этерге онг барды.