Солургъа келгенлени саны ёсе барады

Россейни къыбыла регионларында озгъан эки айны ичинде туристлени саны кёпден-кёп бола баргъаны эсепге тюшгенди. Жангы жылны байрам кюнлеринде Шимал Кавказны курортларында буруннгу жылдан эсе аслам адам бар эди. Аны юсюнден Россейни Банкыны регионлада экономика болум бла байламлы докладында айтылады, дегендиле аны Къабарты-Малкъарда бёлюмюнде.

Ол байрам кюнледе бизни республикада курортлада 103 минг турист солуп кетгенди. Ол а былтыргъы кёрюмдюден 12,5 процентге асламды. Кёпле бегирекда Минги тауну этегинде солургъа сюе эдиле; анда аладан 80 минги болгъанды (былтырдан 14,5 процентге аслам). Канат жолланы хайырланнганланы саны уа 56 мингден атлагъанды. Бир-бир кюнледе ала жети мингден артыкъ адамны кётюргендиле тау бетлеге.

Туристлени саны кёбейгенине курортлада къадар тюрлю жумушла бардырылып тургъаны да себеплик этгенди, дейдиле банкда. Сёз ючюн, бу Жангы жыл байрам кюнледе Азау талада уллу той-оюн программа бардырылгъанды.

«Эсигизге салайым, «Регионланы экономикасы» доклад къырал жарашдыргъан статистикагъа кёре этиледи. Анга  дагъыда  сорууланы эсеплерин, бизнес бла кюрешгенлени эмда экспертлени оюмларын къошадыла. Тинтиулеге онбеш мингден артыкъ предприятие къатышады, ол санда Къабарты-Малкъардан - 135, - дегенди Россейни Банкыны бизни республикада бёлюмюню башчысыны орунбасары Балаланы Расул. – Докладда экономикада болум, логистика, эл мюлкде бла промышленностьда бола баргъан тюрлениуле эмда башха кёрюмдюле эсге алынадыла. Быллай тынгылы анализ экономикада болгъан затланы заманында туура этеди. Аны хайырындан а тергеуле тынгылы эмда ахча-кредит политика да къыйматлы боладыла».

Бу докладны Банкны сайтындан алыргъа боллукъсуз: https://www.cbr.ru/Collection/Collection/File/55066/report_01022025.pdf