Ипотека бериу азайгъанды

Россейни Ара банкыны Къабарты-Малкъарда бёлюмюнде былтыр бизни республикада неллай бир розница кредит берилгенин тийишдирип  эсеплерин чыгъаргъандыла. Тергеулеге кёре, ол кезиуде аллай кредитлени ёлчеми (портфель) 99 миллиард сомгъа жетгенди. Аны бла ол буруннгу жылдагъы кёрюмдюден жети процентге асламыракъ болгъанды. Былтырны ал жарымында адамла кёбюрек кредит алгъанларын, экинчи жарымында уа бу кёрюмдю азыракъ болгъанын да тохташдыргъандыла банкда.

Тенглешдирип айтханда, абери сатып алыргъа берилген кредитлени ёлчеми он процентге азайып, 54,6 миллиард сом къошханды, ипотека уа 3,6 процентге тюшюп, 44,5 миллиард сомгъа жетгенди.

Инсанла 2024 жылда 77 миллиард сом алгъандыла банкладан. Аны бла буруннгу жылны тийишли кёрюмдюсюн 7,3 процентге озгъандыла. Ол санда абери сатып алыргъа  66,6 миллиард сом  неда 2023 жылдан эсе 27,5 процентге кёп берилгенди.

Ипотека бериуде уа кёрюмдюле буруннгу жылныкъындан 46,5 процентге тюшгендиле. Льгота кредитлеге сурам артыгъы бла уллу болгъан кезиуден сора  рынок энди кесине келгенди дерге боллукъду. Дагъыда Россейни Банкы  инфляцияны азайтыр умутда ключевой ставканы да кётюрюп тургъанды. Анга кёре рынокда ставкала ёсгендиле, сурам эмда ипотека бериу да азайгъандыла. Бу оноуну хайырындан а энди вкладлада ахча тутуу файдалы болгъанды: адамла банклагъа бир жылны ичинде 16,4 процентге кёп (65 миллиард сом) ахча салгъандыла.