Жерчиликде уруннганлагъа - учуз кредитле

Быйыл Россельхозбанкны Къабарты-Малкъарда бёлюмю  (РСХБ) жерчиликде уруннганлагъа  жаз башы сабан ишлени болжалдан кеч къалмай тамамларча льгота халда 236 миллион сом ёнкюч берликди.  Ол санда  бюгюнлюкде 73 миллион сомгъа  заявка этилгенди.  

- Хар замандача, банкны жанындан   орта  эм гитче бизнесге тутхучлукъ этиу къыйматлыгъа саналады.  Бусагъатда,  ёнкюч уллу ставка бла берилген кезиуде,  мюлклеге  къолубуздан келгенича болушургъа  кюрешебиз. Агропромышленный комплексни айнытыу регионну эм къыралны да  экономикасын байыкъландырыуда да  уллу къошумчулукъду,-  дегенди РСХБ-ны бёлюмюню таматасы Алим Сокуров.

Былтыр Россельхозбанк  жерчиликде уруннганлагъа 983 миллион сом бергенди, ол санда 280 милионну учуз ставка бла. Буруннгу жыл бла тенглешдиргенде,  эки къауумда да  36 эм 20 процент ёсюм эсленеди. Сагъынылгъан кезиуде жаз башы сабан ишлени бардырыргъа льгота халда  305 миллион сом алгъандыла. 

Банкны билеклиги бла былтыр Чегем районда бир жолгъа   жемишледен  5 300 тонна сакъларча  «Нальчикни садлары» комплекс ишленнгенди.   Инвестициялы проектни асламысы   неда 75 процентин,   финанс учреждение кесинден  тёлегенди. Ол быйыл биринчи кварталдан кеч къалмай хайырланыргъа берилирге  керекди. Мында отуз адам урунургъа онг табарыкъларын да энчи белгилерчады. 

Эсге сала айтсакъ,  РСХБ бла  «Нальчикни  садлары» биригиу  байламлыкъда ишлегенли жети жыл  чакълы болады. Алгъаракълада банкны болушлугъу бла ол 153 гектарда терк айныгъан  терек бахчалыкъ салгъанды. Бюгюнлюкде мында ёсген  546 210 терекчик  бай  тирлик бла къууандырадыла. Аны бла бирге кезиуюнде  тирликни жыяргъа 250 адам келеди. Алагъа ишлери ючюн кюн сайын хакъ тёленеди.