Сабийле тынч жашаугъа къайтырча

Республиканы сабий клиника арасында медицина реабилитация ара ишлеп башлагъанды, аны борчу сабийле къымылдан, жюрюп башларча этергеди.

Мында саулукъларына чып тюшген эм операциядан сора балалагъа багъарыкъдыла. Араны баш врачы Зураб Шарданов айтханыча, багъыудан алгъа ата-анала мында болушуу къалай къуралгъаны бла шагъырейленирге боллукъдула, ала халны кёрюрча къысха экскурсия да къураллыкъды. Реабилитация арада болушлукъну борчлу медицина страхование полис бла алыргъа жарайды, тыш регионладан элли жетинчи форма бла направление алып келгенлеге да къараллыкъды.

Бийик технологиялы оборудование гитче пациентлеге терк къарыу алыргъа, харкюнлюк жашауларына къайтыргъа болушурукъду. Юлгюге, локоматда ДЦП-лары болгъан сабийлени жюрюрге юйретедиле. Неврология бёлюмде эсепде психикаларында бла сёлешиулеринде, къымылдауларында, башха жаны бла да тыйгъычлары болгъан аслам сабий бардыла. Реабилитация тынгылы барырына докторланы къаууму къарайдыла, ол санда невролог, эндокринолог, реабилитолог, гастроэнтеролог, психолог, логопед. Ала бирге жыйылып, сабийге энчи программаны жарашдырадыла, дейди аны башчысы Оксана Пачева. Сабий арадан чыкъгъанындан сора да, саулугъун кючлерча эсгертиуле этиледиле, алай бла ата-аналада уллу жууаплылыкъ барды. Жангы бёлюмде аз тюбеген аурууланы да багъарыкъдыла. Аны ючюн энчи ара ишлейди.

Быллай жер жангыз республикабызгъа угъай, саулайда Шимал Кавказгъа да жангыды. Бийик технологияладан сора да, мында арт-терапияны, тюрлю-тюрлю оюнланы, физиотерапияны да хайырланадыла.