Уллу, гитче да тири къатышадыла

Бюгюн Китап саугъалауну халкъла аралы кюнюдю

Бу ахшы байрам 2012 жылда къуралгъанды эм аламат тёреге айланнганды. Быйыл бу кюнню саулай дунияда 40 къыралда белгилерикдиле. Россейде да  магъаналы кюннге энчи эс бёледиле.

Жыл сайын анга аталгъан акцияла тёрели болгъандыла. «Китапланы сюймеклик бла беригиз» деген жандауурлукъ акция аладан бириди. Аны

бардырыугъа белгили актёр Максим Аверин башчылыкъ этеди. Ол кюн школлада эм башха окъуу учреждениялада аланы китап фондларын толтуруу мурат бла аллай жумушну ётдюредиле. Сёз ючюн нальчикчи окъуучула  юйлеринден бирен китапны саугъалайдыла школларына. Геккиланы Айна школ бибилиотекагъа Жабелланы Лидияны орус тилде жазылгъан «Эльдар в стране нартов» деген китабын элтирге сюйгенди.

Дагъыда бу кюн кёпле окъугъан китапларын, иш этип, унутуп да кетедиле олтургъан жерлеринде неда орамда бара, бир танымагъан адамларына саугъалайдыла.

Андан сора да,  китап окъууну бир тюрлю интернет басмала неда фильмле алышындыралмазларын ангылай, бизни къыралда кёп тюрлю проектле да жашауда бардырыладыла. Аладан бири «Китапны саугъаларгъа сылтау керекмейди» деген ат бла ётеди. Ол кюн кёп тюкенледе тынгылы скидкала этиледиле. Нек дегенде бюгюнлюкде ариу, омакъ китапланы алыргъа кёплени къолларындан келмейди. Быллай кюн а аллай онг бериледи. Аланы бир къауумлары байрам кюннге дери да ишлеп башлайдыла.