Патриот сезимни къозгъарча

Бу кюнледе Искусстволаны Шимал-Кавказ къырал институтуну маданият эмда искусство колледжинде «Афган уруш бюгюннгю кёз  къарам бла» деген ат бла  кишиликни дерси ётгенди.  Ол Афганистандан совет аскерле чыгъарылгъанлы 36 жыл толгъанына жораланнганды.

Ол кюн студентлени  «Боевое братство» биригиуню  регион бёлюмюню толтуруучу комитетини таматасы, Кишиликни орденине тийишли болгъан Владимир Абаноков жокълагъанды. Ол Афганистанда аскер къуллугъуну, анда бардырылгъан аскер операцияланы юслеринден хапар айтханды. Андан къайтхандан сора, не ишлегенин, Кишиликни ордени анга не ючюн берилгенин билдиргенди. Андан сора уа тарых илмуланы кандидаты  Марина  Кулова эмда колледжни тёртюнчю курсуну студентлери  хазырлагъан  документли фильм кёргюзтюлгенди.

Тюбешиуге къатышханла дагъыда  аскерчилерибиз, Ата журтну къоруулаучулары этген батырлыкъны юлгюлеринде жаш тёлюню къалай юйретирге кереклисини, къазауатда ёлгенлени  атларын ёмюрлюк этиуню, жашланы аскерге  хазырлауну, патриот сезимни сингдириуню юслеринден да  сёз баргъанды. Жаш адамла  энчи аскер операциягъа къатышханлагъа, ветеранлагъа да  ыспас этгендиле, алагъа  къолдан келген болушлукъну аямазгъа айтхандыла. Ахырында уа  къонакълагъа  кёп  соруула да бергендиле. 

Тюбешиуню  «Патриот» регион жамауат организацияны директоруну орунбасары, профессор Эфендиланы Фуад эмда преподаватель Наталья  Прокудина «Боевое братство» эмда «Патриот» жамауат организацияла бла бирге «Тарыхны эсде тутуу» проектни чеклеринде  къурагъандыла.