Тин хазнабызны айнытыр муратда

Бюгюнлюкде къарачай-малкъар халкъны маданиятын, тилин, тарыхын сакълауну, мындан ары айнытыуну къайгъысын кёргенле, насыпха, бардыла. Ёсюп келген тёлюге байлыгъыбызны багъасы нечик бийик болгъанын ангылатыргъа итиннгенле ол жаны бла кёп мадарла излейдиле, тапхан да этедиле.

Шёндюгю жашау, не десек да, Интернет бла къаты байланыпды. Уллубуз, гитчебиз  да анда  заманыбызны  кечиндирирге  сюебиз.  Аны  эсге ала, миллетибизни адамларын халкъыбыз бла байламлы теле  эм радио бериулени бир жерде бирикдирип, эфирге чыгъарырча онгну алгъаракълада «Барс Эль» жамауат организация бла «Эльбрусоид» фонд къурагъандыла. Къарачай-малкъар интернет телевиденияны  бла радиону аты «Барс Эль Медиа» депди. Ол энчи приложение бла да бериледи. Аны хар адам да Google Play эм App Store платформалада кесини телефонуна салаллыкъды.

Бу ишни миллетибизни тарыхы  бла тили  сакъланырына къайгъыргъан, маданиятыбызны айнытыугъа терен  магъана берген, жаш тёлюню билимли этиуню  уллу борчуна санагъан адамларыбыз бардырадыла.

Проектни къурар  оюм бир къауум жыл мындан алгъа келген эсе да, техника жанындан онгла арт кезиуде къуралгъандыла: Интернет технологияланы  айныулары ким да къарарча, тынгыларча онгла бергендиле. Телевиденияны, радиону да бир сайтха бирикдирип, бизни адамлагъа кече-кюн да, дунияны къайсы  этегинде да хакъсыз къарарча, тынгыларча мадарла хайырланнгандыла.

Быллай медиа-проект ангылаулары болгъанланы къолларында болургъа кереклиси хакъды. Аны бла бирге, къарачай-малкъар миллетни маданият-жарыкъландырыу, билимни ёсдюрюу, тин хазнасын жайыу ишледе бизге болушургъа къолларындан келликлеге да бу ишни бардыргъанла ыразы боллукъдула. Проектни игилендириу жаны бла оюмларын, сагъышларын айта, жангы программала къураяллыкълагъа да жол ачыкъды.

Ол миллетибизни бюгюннгю болуму салгъан излемлени, жангы жетишимлени, бар кемчиликлени юслеринден кесини энчи программаларын да кёпден-кёп эте барыр  умутлуду.

Бу проектни чеклеринде авторла  жетишимлени, кемчиликлени  да миллет бла бирге сюзерге хазырдыла. Дагъыда былайда «Барс Эль Медиа» политикадан тышында болгъанын чертирчады. Кеси да жаланда къарачай-малкъар халкъны сейирлери бла чекленирге демейди  Битеу къыралда бола тургъан магъаналы ишледен артха турур мураты жокъду. Аланы бирлешип тындырыргъа кереклисин ким да ангылайды. Ол себепден къыралыбызны кёп тюрлю тин хазнасын  башхалагъа да ангылатыр жанына ишлерге, дунияда сейир затла бла къараучуларын, тынгылаучуларын танышдырыргъа хазырды. 

Жашаугъа къарамлары бирге  ушагъан башха медиа-ресурсланы «Барс Эль Медиа» бла  байламлыкъла жюрютюрге чакъырады. Бир болсакъ, кёп жумушла тамамлаяллыгъыбыз хакъды.