Даражалы эришиуге къатышадыла

 Россейли окъуучула математика дерсден оналтынчы халкъла аралы олимпиадагъа къатышырыкъдыла. Ол а бу жол Румынияны Бухарест шахарында бардырылады. Школчула анга узакъдан окъутуу (дистанцион) халда къатышырыкъдыла эмда берилген ишлени уа «Сириус» билим бериу арада тамамларыкъдыла.

Россейни окъуучуларындан къуралгъан къауумгъа уа Санкт-Петербургну 239-чу номерли физика-математика лицейинден Илья Замоторин, Владивостокну къытай тилни терен  окъутхан 9-чу номерли школундан Василий Патрушев, Челябинскни 31-чи физика-математика лицейинден Артём Садыков, Москва областьны Химки шахарыны онтёртюнчю мектебинден Иван Часовских киргендиле.

Къауумгъа башчылыкъны физика-математика ызлы 239-чу номерли президент лицейни математикадан устазы Кирилл Сухов этерикди. Аны орунбасары уа Москваны физика-техника институтуну бийик математика кафедрасыны доценти Павел Кожевниковду.

Бу къауумну аллай даражалы олимпиадагъа къатышханы уа Россейде билим бериуню качествосун ачыкълагъан эмда ол (Россей) дунияда окъутуулары эм кючлю болгъан он къыралны тизмесине бош анстан тюшюп къалмагъанын дагъыда бир кере кёргюзтген  шартды.  Анга кёлюбюз кётюрюлгени бла бирге жашла олимпиадада къыралыбызда билим бериу тийишлисича къуралыулу болгъанын бютюнда ачыкъларла деген  ышаныулукъдабыз.