Сабийлеге – «Зауукълу эришиуле»

Сабийлени бла жаш тёлюню чыгъармачылыкъ арасында жыл сайын бардырылыучу «Зауукълу эришиуле» битеуроссей сынауланы регион кезиую бардырылгъанды. Алагъа саулай да республиканы мектеплеринден он къауум къатышханды.

Сабий спорт байрам тёрели халда битеу къыралда къуралады, быйыл анда къарыуларын абаданыракъ жыл санда окъуучула – тёртюнчю-алтынчы класслагъа жюрюгенле - кёргендиле. Къауумла кеслерини мектеплеринде хорлагъанладан жыйылгъандыла, хар бирине ючюшер жашчыкъ бла къызчыкъ киргендиле. 

Эришиулени баш судьясы – Къабарты-Малкъарны спортуну бла физкультурасыны сыйлы къуллукъчусу Владимир Миновский белгилегенича, сынауланы мураты сабийлени физкультура бла кюреширге, саулукълу жашау бардырыргъа кёллендириудю, алагъа олимпиаданы белгилерин билдириудю. Окъуучула да, Олимпиаданы теркирек, бийигирек, кючлюрек деген ниетлерине тийишлиликде, усталыкъларын, хорламгъа итиниулюклерин, къауумну ичине бир бирлери бла байламлыкъда ишлей билгенлерин да ачыкълагъандыла. Ала мектеплеринде къалай хазырланнганларыны юсюнден да айтхандыла. Сёз ючюн, Аушигерни мектебини къауумундан Гергъокъланы Даниял, спорт залда жыйылып, хар эстафетагъа кёре жарау этгенлерин билдиргенди. Сабийлеге кёл а тренерлери этдиредиле, ала окъуучуланы кеслерине да ала сейир болгъанларын, кертиси бла зауукълу кёрюннгенлерин чертедиле. Эришиулени ата-анала да жаратадыла эм быллай оюнланы дайым къурай турургъа чакъырадыла.