Къойчулукъну айнытыуну юсюнден сёлешиннгенди

Бизни республикада мюлкледе селекция-къумалы ишни айнытыуну юсюнден Къабарты-Малкъар къырал аграр университетни ветеринария бёлюмюнде илму-сынам семинар бардырылгъанды. Ары жыйылгъанла къойчулукъну айнытыу жаны бла оюмларын туура этгендиле, деп билдиргендиле вуздан.

Факультетни деканы Тимур Тарчоков къойчулукъ продукцияны чыгъарыу эмда жарашдырыу жаны бла билим берген программа жарашдырылгъанын билдиргенди, КъМР-ни Эл мюлк министерствосуну малчылыкъ департаментини таматасы Аслан Бисчёков а республикада къойчулукъну айнытыу жолларыны юсюнден хапарлагъанды. «Дарган» мюлкню башчысы Бёзюланы Магомет къарачай къойну къумасын игилендириуге къарамы бла шагъырейлендиргенди, анда зоотехник-селекционер болуп ишлеген Руслан Шебзухов а къойчулукъну жумушларын жалчытыу жаны бла оюмун билдиргенди. Доклад этгенлени санында университетни талай келечиси да бар эди.

Семинарны ахырында тийишли оноула этилгендиле, къойчулукъну айнытыу къыйматлы болур ючюн, ишге шёндюгю амалланы кенг сингдирирге кереклисин да чертгендиле.