Тырныауузда жангыртылгъан спорт ара

Республиканы Башчысыны Администрациясындан билдиргенлерича, Тырныауузда «Геолог» спорт-саулукъландырыу араны ремонту бардырыла турады.

В.А. Губановну атын жюрютген спорт ара шахарчыла, районда жашагъанла да эм сюйген жерледен бириди. Мында волейбол, футбол, карате, бокс, женгил эм ауур атлетика, спорт гимнастика бла кюреширге боллукъду. Эришиуле да дайым къураладыла, ол санда республиканы, округну, Россейни да биринчиликлери бла чемпионатлары ётедиле.

Бюгюнлюкге араны тышы жангыртыла турады, хауа, жылыу берген системала да алышындырыллыкъдыла. Андан сора да, спорт майданлагъа, тренажёр заллагъа бла кийиннген жерле тапландырыллыкъдыла, жангы оборудование бла жалчытылынырыкъдыла.

Битеу бу ишле «Эллени битеулю халда айнытыу» федерал программаны чегинде толтуруладыла.