Къонакълагъа – ариу отоула, сейир жолоучулукъла да

Россейде, тыш къыраллада да белгили «Иткъол» пансионат солугъанлагъа къонакъбайлыкъ этгенли жарым ёмюрден озгъанды. Ол Терс-Къолдан узакъ болмай, нарат агъачны тийресинде орналыпды.

Кеси заманында бийик таулада ишленнген къонакъ юй Приэльбрусияны белгисине саналгъанды, даражасы да уллу болгъанды. Минги таугъа чыгъардан алгъа альпинистле анга къайтмай кетмегендиле, ол тау лыжачыланы, туристлени да эм сюйген жерлери эди. Аны къонакъларыны араларында айтхылыкъ адамла да бардыла – космонавтла Алексей Леонов, Георгий Гречко, алим-физик Евгений Велихов, суратчы Илья Глазунов, коммунист партияны ара комитетини членлери, тыш къыралланы башчылары окъуна.

Пансионат ачылгъандан сор,а экинчи жылда анда Станислав Говорухин «Вертикаль» деген фильмин алдыргъанды. Анда баш жигитледен бирин ойнагъан Владимир Высоцкий артда бери кёп кере къайтып келгенди. «Иткъолда» ол кесини энчи 407-чи номерли отоуунда Басхан ауузуну тауларыны, керти тенглерини юслеринден кёп жыр да тизгенди. Артда аны музей этгенбиз. Ол, сора мекямны аллындагъы эсгериу къанга да закий жырчыны эсибизге тюшюртгенлей турлукъдула. Аны бла байламлы бизде дагъыда гитара музыканы «Золотая струна» деген регионла аралы фестивалы да бардырылгъанды, анда Высоцкий бла Юрий Визбордан сора да, башха белгили бардланы макъамлары эшитилгендиле. Турист арада 60-чы жыллада Олег Стриженовну, Марианна Вертинскаяны, Михаил Пуговкинни эм башха актёрланы къатышыулары бла «Его звали Роберт» деген комедия да алыннганды.

70-80-чи жыллада жазда, къышда да бери солургъа асыры кёп адам келгенден, жер барысына да жетмей окъуна къалыучу эди. Алагъа мында тургъан эки ыйыкъларында экскурсияла, фестивальла, концертле, эришиуле дайым къурала тургъандыла. Отуз жылдан аслам заманны пансионатха башчылыкъны Хасанби Думанов этгенди. Ол кезиуде «Иткъол» Туризм эм экскурсияла жаны бла ара советни турист объектлерини араларында бир ненча жылны Къызыл байракъны башхалагъа ычхындырмай окъуна тургъанды. Хасанби Ахматович кеси уа «Халкъланы шуёхлукъларыны орденине» тийишли болгъанды.

Арт кезиуде, алгъаракъдагъы къыйын жылланы санамасакъ, кёпден-кёп адам келип башлагъанды. Солуу кезиу мында да, Минги тауну башха турист жерлериндеча, декабрьден мартха дери созулады. Алай жайда да келгенле иги кесек болгъандыла. Спортчуланы да сагъыныргъа керекди. Ала мында жыл сайын жарау этерге жыйылыучудула. Пансионатны инструкторлары солугъанлагъа не заманда да сейирлик экскурсияла къураргъа, жолоучулукълагъа элтирге, кёп жангы затла да айтыргъа, кёргюзтюрге хазырдыла.