Нальчикде – Буз ара

Нальчикде жууукъ заманда спортну къыш тюрлюлери бла кюреширча Буз араны ачылыуу боллукъду, деп билдиредиле Спорт министерстводан.

Мекям тёрт минг квадрат метр жерни алады, регионда ол шёндюгюлю излемлеге келишген эм жангы жерди. Аны къурулушу «Демография» миллет проектни чегинде «Спорт-жашауну низамы» федерал проектге кёре бардырылгъанды. Арада хоккей, керлинг, фигурное катание бла кюреширге жарарыкъды, анда регионла эм регионла аралы эришиуле  да къураллыкъдыла, юч жюзден аслам къараучуну да сыйындырырча бир жери боллукъду.

Арада спорт зал, юйретиуню бардырырча методика отоула, ашхана, спорт кийимлени къургъакъсытырча эмда конькилени билерча жерле да боллукъдула. Аны къурулушу бошалгъанды, бусагъатда мекямны республиканы хазнасына ётдюрюрча къагъытла жыйышдырыла турадыла.