Заманында тёлегенлени санына къошулады

 «Россети Северный Кавказ» - «Каббалкэнерго» биригиу былтыр абонентлерин ток бла жюз  процентге жалчытханды. Сагъынылгъан кезиуде хайырланылгъан электрокюч ючюн 2,1 миллиард сом  тёлегендиле. Буруннгу жыл бла  тенглешдиргенде, ол 224 миллион сомгъа  кёпдю.

Сагъынылгъан кезиуде эм иги кёрюмдю (101 процент)  Май бла Лескен районла болдургъандыла. Андан сора Нальчик бла Бахсан  шахар округлада,  Черек,  Терк, Бахсан, Прохладна, Зольск районла да 100 процентге жетгенди.

- Заманында тёлегенлени санына къошула баргъаныны баш сылтауларындан бирлерине – жамауат бла тири билдириу, ангылатыу иш бардырылгъанын, арт заманда абонентле электрон амалны   да тири хайырланнганларын белгилерчады,- дейди  «Россети Северный Кавказ» - «Каббалкэнерго» биригиуню таматасы  Резуан Загаштоков.

Бюгюнлюкде  «Свет Онлайн» приложение  кимге да тап болурча амалды. Аны себеплиги бла комиссиясыз тёлерге, эсеплеген приборда ненча санагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

 «Россети Северный Кавказ»-«Каббалкэнерго» биригиуню келечилери токну къаллай бир саналгъанын айны 23-26 кюнлеринден кеч къалмай жиберирге эм тёлеулени уа айны онусуна дери этерге кереклерин эсге саладыла.

Эсге сала айтсакъ, эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа: ишлерин сюдге бериу, токну хайырланалмазча чек салыу киреди. Уллу кёллюлюк этгеннге борчундан тышында, тазир тёлерге да тюшерикди.