Аскер усталыкъ сыйлы иш болгъанлай къаллыкъды

2025 жыл – Россейде Ата  журтну къоруулаучусуну жылы

Жансюйланы Аскарны жашы Эльдар СВО башланнганд,а аскерчи борчун толтурургъа баргъан  жашланы биринчи къауумунданды.  Ол Звездный элде  аскер бёлюмде келишим бла къуллукъ этгенди. СВО-да салыннган борчланы толтура, кишилиги, батырлыгъы ючюн Суворов атлы майдалгъа тийишли кёрюлгенди.   Бу къырал саугъа уа, болумгъа тийишлиликде, «…Ата журтну къоруулагъанда, Россей Федерацияны сейирлерин сакълагъанда, аскерчи кёргюзтген жигитлик ючюн…» бериледи.

- Ол кюнлени эсгерген къыйынды.  Биринчи атышыуда ауур жарала алгъанма – къолума, аякъларыма. Ол сермешни юсюнден кёп айтылгъанды, эшитген да болурсуз. Душманны къуршоууна тюшюп, андан чыкъгъан кезиуде болгъанма жаралы. Мени биргеме энтта Этезланы Ануар бла Бачиланы Алим да болгъандыла. Жашла экиси да анда жан бергендиле, жаннетли  болсунла,-деп эсгереди Эльдар.

 Энчи аскер операцияны биринчи кюнлери къыйын болгъанлары барыбызны да эсибиздеди. «БТР-лени болушлугъу бла мени эмда башха жаралы болгъанланы  госпитальгъа ючюнчю кюн чыгъаралгъандыла»,-дейди ол.

  Эльдар 2003 жылда къол салгъан эди аскерде къуллукъ этиуню юсюнден келишимге. «Аскерчини усталыгъын сабийлигимден  сюйгенме. Аскер училищеге кирирге да кюрешгенме, болалмагъан эсем да, сайлауума ыразыма»,-дейди ол.

Аскерде туугъан нёгерлик бир заманда да унутулмайды. Башха тюрлю болур амалы да жокъду, деп ышарады ушакъ нёгерим. «Аскерчи къарындашлыкъ деп эшитген болурсуз. Кесибиз угъай, юйюрле бла байланыпбыз. Аллай антлы нёгерлеримден бири Этезланы Ануар эди»,-дейди Эльдар. 

Биз ушагъыбызны Ата журтну къоруулаучусуну кюнюню аллында бардыргъаныбыз себепли, Эльдар газетни окъуучуларын, нёгерлерин байрам бла алгъышлайды. Жашауларын аскер бла байларгъа  сюйген жаш адамланы уа къоркъмазгъа, муратларыны ызындан барыргъа чакъырады.

- Хау, ал кезиуде къыйыныракъ да кёрюнюр – юйде ата, ана не жумушунга да къайгъырады. Аскер а жашны кесини жашауу, жууукълары, тукъуму, къыралы ючюн жууаплы болургъа юйретеди. Байрам бла алгъышлай, аскерчи нёгерлериме, «Заманны» окъуучуларына саулукъ тилерик эдим. Къаугъада жаралы болгъанла къысха замандан аягъы юсюне болсунла,-дейди ол.

 Эльдар юйдегиси бла бирге юч сабий ёсдюреди – эки жашны бла къызны. «Жашла аскерчи билим алып, бу усталыкъны сайласала ыразы боллукъма. Ата журтну къоруулаучусу не заманда да сыйлы,  хурметли иш болгъанлай къаллыкъды»,-дейди Эльдар ушагъыбызны ахырында.