Шёндюгю мардалагъа келиширикди

Терс-Къолда "Жангы школ" федерал проектни чеклеринде 150 окъуучугъа  мектепни къурулушу барады, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан. 

Элде эки къатлы школну мекямы 1960 жылда ишленнгенди. Алгъа мында  къурулуш управление орналгъанды, ызы бла  общежит болуп тургъанды.  Алай бла онеки жылдан сора аны мектепни борчун толтурурча жарашдыргъандыла. Болсада ол, эски болгъаны бла бирге,  билим бериу учрежденияладан изленнген  мардалагъа да келишмегенди. Аны себепли элни ортасында жети минг квадрат метрде  эрттеден бери бош тургъан  спорт комплексни  орунуна  жангы мектеп  салыргъа келишгендиле. Анга федерал бюджетден 155 сом бёлюннгенди.   

Бюгюнлюкде аны биринчи блогунда экинчи къатысына дери конструкциясын хазырлагъандыла эм тыш къабыргъаларын къалап кюрешедиле. Экинчисинде да экинчи къатын  кётюрюп бошай турадыла, ызы бла къалап башларыкъдыла.  
Учрежденияны арбазы да айбатландырыллыкъды. Ол санда топ, баскетбол ойнаучу эм тренажёрлары бла жараула бардырыргъа майданла да къураллыкъдыла. 

Ишлени башлардан алгъа, тийишли экспертиза этилгенди. Аны бла бирге къурулуш ишле жангы мардалагъа келиширлерине эм тынгылы материалла да хайырланырларына республиканы Тынгылы ремонт бардырыу жаны бла  управлениясы дайым  контроль бардырады. 

Планнга кёре, мектеп быйылны ахырына бошалыргъа керекди.