Жангы бериуде – жаубауур

Италиялы Федерико Арнальди бардыргъан «Барайыкъ да, ашайыкъ» деген программаны кезиулю бериуюн Къабарты-Малкъарны тауларында алгъандыла.

Бериуню республикабызда биринчи кере тюшюрмейдиле, Федерико мында алгъаракълада да болгъанды, энди уа ол жаубауурну кеси хазырларыкъды. «Жаубауур къаллай татыулу азыкъды, къалай жаратханма аны. Бауургъа кёз къарам бирча тюйюлдю, бирле аны жаратадыла, башхала - къатларына да къоймайдыла. Мен да аны бир бек сюйгенледен тюйюл эдим, алай жаубауурну ашап кёргенимден сора, бауур башха тюрлю кёрюнюп башлагъанды, бек сюйгенме», - дейди къонакъ.

Жангыдан Къабарты-Малкъарны уа жамауатны жарыкълыгъы, къонакъбайлыгъы, ашларыбызны да татыулу, татымлы да болгъанлары ючюн сайлагъанды. Адет-тёрелерибизге бийик багъа биче, ол къонакъбайлыкъ, жарыкълыкъ битеу дуниягъа да керек болгъанларын чертеди. «Италиячыла бла кавказлыла халлери бла бир бирлерине, айхай да, ушайдыла. Биз барыбыз да къыбыла жерледе жашайбыз, сезимлерибиз бирде алгъа барадыла, башхалыгъыбыз а италиячыла сизден къонакъбайлыкъгъа юйренирге керек болгъанларындады. Италияда къонакъгъа кирсенг, хант къанганы толтуруп тюбейдиле деп, мени эсимде жокъду. Жангыз да мында семиз болуп къалырыма къоркъуу чыгъады, къайры барсам да, ашатыргъа кюрешедиле», - деп ышарады. 

Федерико Римде туугъанды.  Италияда россейли къызгъа тюбеп, аны, ызы бла уа Россейни да сюйгенди. Къыз аны орус маданият, санат, адабият бла шагъырейлендиргенди. 2011 жылда Россейге келип, аны кеси кёзлери бла кёргенинде, бютюн бек сюйгенди. Алты тилни биледи, орусчагъа да, ол къыйыныракъ кёрюнсе да, юйреннгенди. Къадар ол тиширыу бла бирге этмесе да, Россейге сюймеклиги уа таркъаймагъанды, жашаргъа мында сюйюп, бери кёчгенди. Музыка бла кюрешеди, телевиденияда да ишлейди. «Ким биледи, къадар болуп, бери, таулагъа, ариу къонакъбай адамлагъа жууугъуракъгъа кёчсем да», - дейди. 

Жангы бериуню НТВ-да жыйырма экинчи февральда кёрюрге боллукъду.