Шахар айнырына къайгъыра

Беш жылны ичинде Шимал Кавказны онтёрт шахары, ол санда Нальчик, айнытыу жаны бла проектле къоллу боллукъдула, деп билдиргенди «ТАСС Кавказ»  ара бардыргъан пресс-конференцияда  «ДОМ. РФ» институтну шахар тийрени айнытыу жаны бла таматасы  Антон Финогенов.

Мастер-план 2030 жылгъа дери шахарланы айнытыуну  федерал программасыны чеклеринде бардырылады.  Бюгюнлюкде   Владикавказныкъы  хазырды,  жууукъ заманда Ингушетияныкъы да тамам  боллукъду.   

 Къурулуш документ  узакъ заманда хайырланырча проектди. Сёз ючюн,  энчи бир жерде къаллай тюрлениуле этилликлери алгъадан белгиленедиле. Анга къурулушдан тышында,   экономика, социал эм экология тюрлениуле да  киредиле. 

- Бюгюнлюкде Президентни буйругъу бла 2030 жылгъа  200 мастер-план  къуралырча жумуш тамамланады. Ол тизмеде Шимал Кавказдан  Минеральные Воды, Георгиевск, Ставрополь,  Черкесск, Нальчик, Махачкъала шахарла, битеу да  14-сю бардыла, - дегенди  Антон Финогенов.

Ол: «Регионлада къырал программаланы  жетишимли тамамларча тынгылы план жарашдырыргъа керекди. Ол кёп башламчылыкъда болушурукъду, ол санда  къаллай бир ахча къоратыллыгъы да алгъадан белгили боллукъду»,  –  деп къошханды.