Агъачны айнытыугъа алланып

Былтыр Лескен районда «Экология» миллет проектге кёре  агъач  фондну 47 гектарындан аслам жерде  терекчикле орнатхандыла. Аны магъанасы регионну экология болумун игилендирирге, жашиллендирирге эм жангыртыргъа жарагъан  табийгъат байлыкъны кёбейтиргеди.

Лескен  районну  чеклеринде орналгъан агъачла кёбюсюнде  къургъакълыкъдан, желледен эм  къаты жауунладан сакълайдыла.

 Терекчиклени 17 гектарда къол бла орнатыргъа тюшгенди, дагъыда 30 гектарда уа техника  болушханды. Аны бла бирге специалистле агъачны болумун игилендирирча санитар эм башха тийишли жумушланы да  тамамлагъандыла.

Субботник бардыргъандыла

Озгъан солуу кюнледе Зольск  районда чууакъ кюнлени  керексизге жибермей,  субботник бардыргъандыла, деп билдиредиле муниципалитетни администрациясыны пресс-службасындан.

  Алай бла эл тийрелени кир-кипчикден тазаларгъа, администрацияланы, билим бериу учрежденияланы, маданият бёлюмню, жамауат  организацияланы келечилери, устазла эм   школчула да чыкъгъандыла.

Акцияны кезиуюнде социал магъаналы  объектлени тийрелерин,   эллени къатларында жерлени, черек сууланы боюнларын, агъач ызланы да тазалагъандыла эм  Уллу Ата журт урушда ёлген аскерчилени  эсгертмесин да тап халгъа келтиргендиле.
 

Эсге сала айтсакъ, быллай субботник эллени санитар болумларын игилендириуде, жамауатны бирикдириуде,  патриот сезимлерин кючлеуде эм табийгъатха аяулу кёзден къарарча да юйретиуде   ахшы къошумчулукъ этеди.