Нальчикни айбат жеринде – жаш тёлю чыгъармачылыкъны арасы

Театрла араны къурулушу 2002 жылда башланнганды, ол кёп заманнга созулуп, хайырланыугъа быйыл жайда берилликди.

Жыйырма жыл мындан алгъа бери юч миллет театрны кёчюрюрге мурат бар эди, алай ахча жетишмегени ючюн къурулуш тохтатылгъанды. Ол заманны ичинде миллет театрла кеслерини тынгылы мекямлары бла жалчытылыннгадыла, ол себепден республиканы Башчысыны оноуу бла мекям энди Жаш тёлю чыгъармачылыкъны арасы боллукъду. Аны тышын тапландырыу жумушла бошалгъандыла, иш ичинде  барады. Подряд организацияны келечиси Муса Кодзов билдиргеннге кёре, битеу жумушла технологияла картаны излемлерине тийишлиликде тамамланыладыла. 

Мекям битеу да жыйырма эки минг квадрат метр жерни алады. Тышындан къарагъанда, ол юч къатлыча кёрюнеди, алай ичине киргенде, аны бир бёлюмю – беш, экинчиси уа – жети къатлы болгъанларына тюшюнесе. Аны уллулугъун баш сахнагъа сюелгенде ангылайса, былайгъа, башхача, араны жюреги деп да айтадыла, аны кесини бийиклиги окъуна жыйырма метрге жетеди. Залда уа сегиз жюз къараучу олтурлукъдула, дагъыда жюз  элли къараучуну сыйындырлыкъ гитче зал да барды. Мекямны тёгерегине буруула салынырыкъ тюйюлдюле, аны уллу терезелеринден а ариу паркыбыз кёрюнюрюкдю. Юч жанындан эшиклери, ишчилерине дагъыда энчи бир эшик боллукъдула, чекленнген онглары болгъан адамлагъа таплыкъгъа да пандусла ишленирикдиле. Анда хауа айланырына, от тюшюуге къоркъуусузлукъну жалчытыугъа да энчи эс бёлюннгенди. Бюгюнлюкде ишлени сексен проценти толтурулгъанды, жылыу берилгенди, алай бла эм къыйын жумушла бошалгъандыла.