Алма иги кесек сатылгъанды

Россельхознадзорну Шимал-Кавказда регионла аралы  управлениясындан билдиргенлерича, былтыр Къабарты-Малкъарда экспортха жиберилген  алмала    фитосанитар мардалагъа келиширча  132,5 минг   тоннасына   контроль этилгенди. Буруннгу жыл бла тенглешдиргенде, ол 17 процентге кёпдю.

Продукциягъа иги кесек къошулгъаны бла  алыучуланы саны да ёсгенди. Сёз ючюн, буруннгу жылда жемишле 36 регионнга сатылгъан эселе, былтыр ол 13 тизмеге кёбейгенди.

Алай бла Жангы жылны аллында Къабарты-Малкъарны алмалары Иркутск, Мурманск областьланы, Красноярск крайны эм къыралны жангы регионларында -  Донецк бла  Луганск халкъ республикаланы сатыу-алыу точкаларында да  сатылгъандыла. 

Эсге сала айтсакъ, алмала тышына ашырылырларындан алгъа  къоркъуусуз эм тынгылы болгъанларына   тийишли  тинтиулени ётедиле. Ол себепден жыл сайын  республика ёсдюрюлген жемишлеге сурам ёсе барды.