Санаторийде хакъ тёлемей солургъа боллукъду

Союзну заманында санаторийде солургъа кёп къалмай хар кимни да онгу болгъанды. Къырал ишледе адамлагъа  хакъсыз путёвкала бериучю эдиле. Бюгюнлюкде  уа ол тёре хазна жокъду. Бир-бир компанияны,  кеслери оноу этип, адамларын учуз багъасы бла неда алайлай жибередиле жаланда. Алай ол къауумгъа тюшмегенликге да, барды онг санаторийге абери тёлемей барыргъа. Къалай? Аны юсюнден Объясняем.рф порталда жарашдырылгъан материал бла шагъырейлендирейик.

Санаторийге путёвка хакъсыз кимлеге бериледи?

Къырал льготниклеге. Анга ма бу къауумлагъа кирген инсанла тийишлидиле:

- Сакъатла, ол санда аллай сабийле;

- Уллу Ата журт урушну ветеранлары;

- Ленинградда блокада болгъанда эмда Севастопольну тёгереги бийленнгенде жашагъанла;

- Урушну эмда аскер къазауатланы сакъатлары;

- Урушда эмда аскер къазауатлада сакъат болуп ауушханланы юйдегилери;

- Чернобыльде аварияда эмда ядерный сынам ишледе радиациядан хата кёргенле.

Регион льготникле: Бир-бир регионлада ма бу къауумлагъа онг бериледи:

- Ишлемеген пенсиячылагъа эмда пенсиягъа чыгъар заманлары жете тургъанлагъа;

- Урушну сабийлерине;

- Сыйлы донорлагъа;

- Террорчулукъ ишледе жаралы болгъанла эмда аланы юйдегилери;

- Аскер пенсиячыла эмда МВД-да ишлеп кетгенле.

Быллай инсанлагъа, ала жашагъан регионнга кёре, путёвкаланы хакъ тёлетмей неда учуз (50-75%) багъасы бла берирге боллукъдула.

Аны ишин этерча, эм биринчиден, адам санаторийде багъылыргъа керекди деген битеу керек къагъытланы жыяргъа керекди. Ала  ма была болургъа боллукъдула: сакъат болгъаныны юсюнден справканы, терапевтни заключениясын, ветеранны удостоверениясын. Къысхасы, путёвканы алырча ма бу атламланы этерге тийишлиди:

- Документлени жыйыгъыз: Паспорт, путёвкагъа заявление, врачдан 070/у формада справка, льготагъа тийишли болгъаныгъызгъа документ.

- Заявленияны беригиз. Аны «Госуслуги» порталда тамамларгъа боллукъду. Сюйсегиз а, Социал фондну неда МФЦ-ны бёлюмлеринде. Анга сегиз ишчи кюнню ичинде къараргъа керекдиле.

- Санаторно-курортный картаны алыгъыз: Путёвка бериуню дурус кёрген эселе, врачдан картаны, ызы бла уа санаторийге орналгъан жерге билет алыгъыз. Социал фонд а жолну багъасыны бир кесегин неда толусунлай жабарыкъды.

Нек угъай дерге боллукъдула?

- Алгъын хакъсыз путёвканы алыргъа сюймеген эсегиз.

- Документле толу болмасала неда заявка заманында берилмесе.

- Заявление  халатла бла жазылып болса неда бир жылны ичинде экинчи кере берилсе.

- Медицина жаны бла чеклениуле болсала.

Саулукъгъа кёре путёвка.

Инсан къыйын ауруудан къутулса неда операциядан сора къайтыша тура эсе, реабилитацияны ётерча анга ОМС полис бла хакъсыз путёвка берирге боллукъдула. Аны ючюн терапевтден направление эмда врачланы комиссиясындан дурус оноу керекди. Путёвка - 18 кюннге, сакъат сабийлеге – 21 кюннге, баш неда сырт мыйылары ауругъанлагъа уа – 42 кюннге бериледи.

Санаторийни сайлау.

Аны оноуун инсан этмейди, учрежденияны врач сайлайды, саусузну халине кёре. Бюгюнлюкде Россейде инсанланы ОМС полис бла алгъан сегиз жюзден артыкъ санаторий барды. Алай бла кёпле,  алада хакъ тёлемей, солуп къайтыргъа боллукъдула. Аны ючюн а адам кесини эркинликлерин билирге керекди эмда ишин жорукълагъа кёре этерге.