Сабийле жылы аш бла жалчытылынырча

Урван  районда гитче класслада окъугъанла,  сабий садлагъа эм яслилеге  жюрюгенле жылы азыкъ бла тийишли халда жалчытылынырча контроль бардыргъан комиссия къуралгъанды.

Сагъынылгъан муниципалитетни администрациясындан билдиргенлерича, быйыл жылы аш  он минг чакълы сабийге бериледи.  Бюгюнлюкде 24 мектепде   бла школгъа дери билим бериу учреждениялада   мониторинг бардырылгъанды.  

Жылы аш бла жалчытыу белгиленнген  излемлеге келиширча билим бериу учредлениялада ата-аналаны санындан къуралгъан   комиссия дайым кёз-къулакъ болгъанлай турады. Ол санда   ашарыкъланы къурамларына, санитар мардала бузулмазларына къарайдыла  эм башха шартлагъа эс бурадыла. 

Эсге сала айтсакъ,  ёсе келген тёлю  саулукъгъа  хайырлы аш-суу бла тынгылы болургъа керекди.  Анга кёре  бу жаны бла иш борчлу халда эм  бир тюрлю бузукълукъсуз толтурулургъа тийишлиди.