Газ ызлагъа жангы хайырланыучула къошулгъандыла

Быйыл 1 январьдан сора Къабарты-Малкъарда газ ызлагъа 126 жангы юй къошулгъанды. Саулай къыралда уа аланы саны 13 мингден артыкъ болгъанды, деп билдиргендиле «Газпром газораспределение Нальчик» компаниядан. Аны бла бизни республика, жашау журтланы газ сетьлеге къошуу жаны бла битеуроссей рейтингде сегизинчи жерни алады.

Эсге сала айтсакъ, бу программа 2021 жылда сентябрьде башланнганды. Бюгюнлюкге Къабарты-Малкъарда аны юсю бла 3,7 мингден артыкъ келишим этилгенди, газ ызлагъа 3,4 мингден аслам юй къошулгъанды, 2,1 юйюр а кёк отлукъну хайырын кёрюп башлагъандыла.

Догазификация программаны чеклеринде  бу жумушну терк эмда тынгылы тамамларгъа себеплик этген Бирикген Портал да ачылгъанды. Анда заявка не халда болгъаны, къаллай документле изленнгени, башха энчиликле бла да шагъырейленирге онг барды.

Ахча тёлемей, газ ызны юйню къатына дери келтирирге сюе эсегиз, заявканы ма бу жерледе беригиз:

- «Газпром газораспределение Нальчик» компанияны бёлюмлеринде (https://www.kbgaz.ru/teruchastki);
- «Газпром газораспределение Нальчик» компанияны арасында (ЕЦПУ);
- Газификация жаны бла Бир операторну connectgas.ru сайтында;
- «Госуслуги» порталда (https://esia.gosuslugi.ru/login/);
- МФЦ-да.

«Догазификация программагъа «Газпром газораспределение Нальчик» компанияда быйыл да уллу магъана бериледи. Биз аны хайырындан жангы ызла созабыз, хайырланыучуланы сетьге къошабыз», - дегенди аны башчысы Залим Вороков.

Газ ызлагъа къошулгъан жангы хайырланыучулагъа эмда башха абонентлеге уа кёк отлукъну багъасын «Энчи кабинетде» тёлерге чакъыргъандыла компанияда. Аны «Газпром межрегионгаз Нальчик» АО-ну сайтында (www.mrgkbr.ru) неда «Мой газ» приложенияда ачаргъа боллукъду. Бюгюнлюкде анда эсепде 55 мингден артыкъ абонент барды.