Ата журтха, юйюрге да махтау сала

Нальчикде Владимир Вороковну атын жюрютген Маданият фонд  «Ата журтум, санга жырлайма» деген ат бла конкурс къурагъан эди. Бу кюнледе уа аны эсеплери  чыгъарылгъандыла.

Конкурсха къатышханла  КъМР-де эмда  андан тышында жашагъан  миллетлени ана тиллеринде   Ата журтха, юйюрге, аланы  магъаналылыкъларына жораланнган эстрада эмда академиялы жырла айтыргъа керек эдиле. Алагъа багъа бичгенлени араларында уа  Искусстволаны Шимал-Кавказ къырал институтуну профессору, РФ-ни эмда КъМР-ни халкъ артисти Наталья Гасташева (ол жюрини таматасы эди), РФ-ни эмда КъМР-ни  халкъ артисти Таукенланы Галина, КъМР-ни сыйлы артисти  Валерий Кайцуков, КъМР-де Жамауат палатаны члени Фатима Гешева, Маданият фондну таматасы Люаза  Макоева да бар эдиле.

Алайды да, эстрада жырда тамата  къауумда биринчи жерге  Атабийланы  Алибек чыкъгъанды. Асанланы Амирагъа уа энчи саугъа жетгенди. Ол кеси да конкурсха къатышханладан эм гитчеге саналгъанды.

Академиялы жырда абаданланы  араларында  экинчи жерге Темуккуланы Аминат чыкъгъанды, кичи къауумда биринчи жер Жаболаны Данагъа  жетгенди.

Хорлагъанлагъа сертификатла, саугъала да берилгендиле.

Бу конкурс тёреге айландырылгъанды эмда быйыл ол КъМР-ни Жамауат палатасыны, республиканы  Миллетлени ишлери эмда жамауат проектле жаны бла министерствосуну, Россейни халкъларыны ассамблеясыны регион бёлюмюню, Халкъла аралы черкес ассоциацияны  себепликлери бла бардырылгъанды.