Солугънлагъаны биргелерине – билимли нёгерле

Жолоучулукълагъа чыкъгъанланы къоркъуусузлукълары ючюн аланы биргелерине баргъан тау туризмден инструкторланы-проводникле жууаплыдыла. Бу ишлерин тынгылы толтурурча аланы аттестациялаугъа былтырдан бери уллу эс бурулады.

Инструкторланы сынаулагъа излемле турист жолоучулукъланы тюрлюлерине, аланы къыйынлыкъларына кёре салынадыла. Аттестацияны ётерге сюйгенле бу жаны бла билимлерин, сынамларын да кёргюзтюрге тийишлидиле. Ала алгъа тестлени ётедиле, сора усталыкъларына керти болумлада къаралады. Тау туризмде жолоучулукъла къыйынлыкъларына кёре алты тюрлю боладыла. Гидлени аланы къалай ётгенлерине багъа аттестация комиссия бичеди, анга уа, тёреде бола келгенича, эм бийик даражалы профессионалла киредиле. Аллай комиссияладан бирини башчысы «Кавказ» араны таматасы Андрей Шушаро билдиргенича, Россейни спорт туризмден федерациясы аттестацияланы иги кесегин бардыргъанды, тау туризмден а Адыл-Сууда ётдюрюлгенди.  «Мындагъы табийгъат сынауланы бардырыргъа аламат тап келишеди, сора тау жолоучулукъланы азындан жартысы Приэльбрусияны жери бла барадыла. Хар не да биз сакълагъаныбызча къуралгъанды, проводникле туристлени биргелерине баргъанда,  къоркъуусузлукъну жалчытыу, биринчи медицина болушлукъ этиу, тау рельефде тюз барыу жаны бла билимлерин кёргюзтгендиле», - дегенди ол.

 «Кавказ» федерацияны тау туризмден сынаула ётдюрюрча жангыз арасыды. Быллай жерледе проводниклени билимлерине къарауну магъанасы чексиз уллуду, нек дегенде таулу, къаялы жерледе туристлени жашаулары, къоркъуусузлукълары да ала ишлерин билгенлери бла къысха байламлыды, деп белгилегенди республиканы курортла эм туризм министри Мурат Шогенцуков. Ол айтханыча, ведомство гидлени хазырлау къалай баргъанын эсепде тутады, спорт федерацияла бла байламлыкъла жюрютеди. Юйретиулени ётген инструкторла къыралыбызны битеу регионларында ишлерге эркин боладыла, аланы юслеринден информация инструкторланы бир федерал тизмесине кийириледи.