Иги кесек объект жангыртыллыкъды

Къабарты-Малкъар «Эл жерлени комплекс халда айнытыу» къырал программаны  тири бардыргъан регионладан бириди.  Аны чеклеринде республикада иги кесек иш тамамланнганды, деп билдириледи КъМР-ни Эл мюлк министерствосуну пресс-службасындан.

Быйылны юсюнден айтханда, Тырныауузда олимпиада резерв спорт школну бла сабий эм жаш тёлю чыгъармачылыкъ араны  жангыртып кюрешедиле. Тынгылы ремонт ишле былтыр башланнгандыла.  Аны бла бирге  Къашхатауда бла Баксанёнокда социал магъаналы   жангы объектле ишленирикдиле.

Ол санда «Баксанёнокну комплекс халда» айнытыу проектге кёре, 140 сабийге садик, таза суу бла жалчытырча  быргъыла, воркауту бла сабийле жараула бардырырча, ойнарча майданла, спорт комплекс, ветеринария клиника да  ишлерикдиле.

Алай бла сабий сад бла спорт комплексден къалгъанла быйылны ахырына хайырланыргъа берилликдиле.

Къашхатауда да быйыл  Къара-Суу - Бабугент – Кашхатау деген таза суу баргъан ыз тартыллыкъды. Ол да  эки жылдан кёпге созулмай битерге керекди.

Сагъынылгъан ишлеге ахча федерал эм республикалы бюджетледен бёлюнюрюкдю. Анга кёре быйыл 595 миллион сом берилликди.

Эсге сала айтсакъ,  «Эл жерлени комплекс халда айнытыу» къырал программа Эл мюлк министерствону башламчылыгъы бла бардырылады. Аны магъанасы эл жерледе сынамлы кадрланы сакъларгъады эм адамланы жашау болумларын игилендириргеди.